"غلطوا في حقهم".. فريدة سيف النصر تنتقد الظهور المتكرر لبعض الفنانين
انتقدت الفنانة فريدة سيف النصر الظهور المتكرر لبعض الفنانين في دراما رمضان، مما يجعل هذا خطأ في حقهم أمام المشاهدين، وذلك من خلال منشور عبر حسابها الرسمي على موقع التواصل الإجتماعي فيسبوك.
رأي فريدة سيف النصر في دراما رمضان
حيث قالت فريدة سيف النصر في منشورها: “أنا لازم اقول كلمة حق وحقيقي أصحابي من صحفيين لفنانين العاديين بيسألوني عن رأيي، هاقول الأول ااسيدات أولًا، أنا محتارة بين أربعة مختلفين تمامًا، لكن كل واحده في لونها اللي اختارته أحلي من نفسها العام الماضي، بدون ترتيب منة شلبي، روجينا، طبعا مي عمر، ياسمين عبدالعزيز، مش معني كده الباقي مش تمام لا والله لكن في ناس برضه بدون ذكر اسماء اختاروا أعمال كأنها امتداد لشخصيات العام الماضي ودي وقعة خطيرة الناس عايزه الجديد، وفي ناس متكررة لدرجة أنك لو قلبت وروحت قناه تانيه مش هاتاخد بالك لأنهم موجودين، ده غلط في حقهم وحق المشاهد، وفي ناس علشان لازم تبقي موجوده في تفكيرهم فأصبحوا بفعل أيديهم غير متابعينهم اصلا ينفع كده، عموما في أعمال كتير برضه ماشوفتهاش بس دوول تابعتهم، عجبوني لحد دلوقتي في اليوم السادس، يارب يفضلوا للاخر بالقوة دي، بالنسبة بقي للي بيقول لي انتي هاتنقدي مش هاتشتغلي، احب اقول عملين كبار اعتذرت علشان ماكررش نفسي، وعمل تاني لنجم زي ما بيقولوا ثبتني معرفش عمل ليه معايا كده، بس كله في وقته نحكي ونقول، المهم أن حقيقي المتحدة عاملة شغل عظمة والإم بي سي عاملة شغل عظمة، والصباح ياجماعه، يحسب لهم كل الأعمال القوية لسه ماتكلمناش عن الرجالة، ولكنهم يحسب لهم العمل المحترم نحييها لنحيا الأعمال الدينية ياجماعة، و شكرا لكل المهتمين بالفن بالذات الهادف، رمضان كريم”.
سبب وفاة شقيق فريدة سيف النصر
وقالت فريدة سيف النصر في بث مباشر مؤخرًا عن سبب وفاة شقيقها: “الله جميل الله رؤوف الله رحيم، الله خلص أخويا من اللي كان فيه، شكة الإبرة بتضيع ذنب، بدر رايح زي الفل، هو سلم هدومه للأرض خلاص، الله يسامح اللي كان السبب، كلها اقدار ومكتوبة، هو دخل المستشفى قلبه تعبه، طلع قلب وكبد وكلى ومرئ وكل حاجة، بطل يا حبيبي، أنا محتاسباه عند الله من رجال الجنة واللهي، مكنش بيسيب فرض، كان بس بيدعي ربنا أنه يبلغه رمضان، أنا مؤمنة بقدر ربنا، الفراق وحش قلبي واجعني عليه، بس هو ارتاح، من الناس واللي بيجرى، اللي عايز يخلص من حد عزيز عليه يوديه مستشفى، في دكاترة كويسين بس كمان الله أعلم باللي بيتعمل، اللي حواليه هو اللي مش مرتاحين، سيبت فراغ جامد أوي يا بدر، أخر مرة سجلي دعاء بصوته في الإنعاش، بشكر كل اللي عزوني، عزائي اخدته من أهل الجنة، ربي قدر وما شاء فعل، أعرفوا أن الدنيا قصيرة أوي مهما إن طالت، حبوا بعض مافيش وقت للمشاكل والصراعات، اتقوا الله في نفسكم، قريبة أقرب مما نتخيل، الدنيا مافيهاش أي حاجة".
