سامح حسين يوجه رسالة للجمهور: مفيش منافسة في الرزق أسعى وسيب التقييم على ربنا
قال الفنان سامح حسين: «العروسة اللي لو اتقدمتلها تقولك مش هوافق عليك غير لما تجبلي دوبلكس سيبها وهتلاقي غيرها عادي توافق تتجوزك في شقتك ال70 متر، والعريس اللي عايزك تخسي 30 كياو علشان يكمل الجوازة سيبيه وهيجيلك حد يحبك زي ما انت منغير ما يحاول يغير فيكي حاجه».
وتابع حسين، خلال تقديمة برنامج «قطايف»: «مش بقولكم متحلموش، لكن لازم نعمل ده علشان نفسنا وننجح علشان نفسنا مش علشان نكون أحسن من زمايلنا وأصحابنا، لا لازم نسعى إننا نكون أحسن من أخر نسخة لنفسنا، لازم نسعى ونفضل نسعى ومنوقفش سعي لكن علشان نفسنا».
وواصل حسين: «وانت لما تشجع عيالك لازم علشان ينجحوا لنفسهم، مش علشان بتقارنهم بقرايبهم مفيش منافسة في الرزق لأن ده بتاع ربنا، ما عند الله لا يؤخذ بمعصيته، علشان تاخد اللي عند ربنا لازم تعمل شغلك بما يرضي الله وسيب التقييم على ربنا».
وفي سياق متصل، كشف الفنان سامح حسين عن استعداده لطرح الموسم الثاني من برنامج قطايف في موسم رمضان المقبل، وذلك بعد نجاح الموسم الأول في رمضان 2025، وقد أعرب عن سعادته بهذا النجاح عبر مقطع فيديو على حسابه الرسمي على موقع تبادل الصور والفيديوهات إنستجرام.
الموسم الثاني من برنامج قطايف
وقال سامح حسين في الفيديو: “بعض الديون التي لا تُري وأنتوا ليكوا عليا دين كبير اووي من السنة اللي فاتت، لو أطول ألف على واحد واحد أقوله شكرًا هعمل كده، لأنكم كنتوا بعد ربنا أصحاب فضل عليا في النجاح اللي ربنا أنعم علينا بيه السنة اللي فاتت، حبيت أبدأ كلامي معاكم بكلمة شكر بسيطة خالص ومش على قد المقام واللهي، وأستأذن حضراتكم تاني أني أكون ضيف خفيف السنادي معاكم في رمضان، وبردو جايب معايا قطايف يارب تعجبكم زي السنة اللي فاتت وأكتر، أنا مستني دعمكم ومساندتكم اللي من غيرها محدش هينجح ولا أي مجهود هيظهر أو هيتشاف”.
طبيعة برنامج قطايف
ويتناول برنامج قطايف في حلقاته اليومية مجموعة من المبادئ الإنسانية، فيقدم رسائل أخلاقية مستمدة من التعاليم الإسلامية، ويستعين بتجارب حياتية حقيقية تعكس هذه القيم، ولذلك لاقى قبولًا واستحسانًا بين الجمهور، بالرغم من عدم عرضه على منصات رقمية أو التلفزيون أو الراديو، ويُعرض في شهر مزدحمًا بالبرامج التليفزيونية والمسلسلات العديدة.
