"لازم يبقى مكتوب حقيقتهم على جبينهم"..أحمد عصام السيد يعلق على أزمة فخر الدلتا
خرج الفنان أحمد عصام السيد أحد أبطال مسلسل فخر الدلتا عن صمته ليؤكد دعمه الكامل للقرار التي تم اتخاذه ضد مؤلف المسلسل، وذلك من خلال منشور عبر حسابه الرسمي على موقع التواصل الإجتماعي فيسبوك.
تعليق أحمد عصام السيد على أزمة فخر الدلتا
وقال أحمد عصام السيد في منشوره: “هتكلم حاليا كـ أحمد عصام الفرد، بيبقى نفسي الناس تكون مكتوب على جبينهم حقيقتهم عشان نتجنب مواقف كتير، لكن الحياة مش كدة، الساعات اللي فاتت فضلت ساكت و بسمع من صديقاتي ايه اللي المفروض اعمله عشان اعمل حاجة مفيدة، فـ مبدئيا بسجل دعمي لأي بنت متضررة، دايما مش سهل البوح و كشف الحاجات اللي زي دي لأسباب كتير، لكن دايما بيكون ده الصح، ثانيا مع اللي حصل و اللي بيحصل، بيأكد ان احنا كـ رجالة، محتاجين نكون منتبهين دايما، خصوصا مع زيادة حوادث التحرش ضد الستات والبنات دلوقتي اكتر من أي وقت فات ان لو حد جالنا بشكوى، نكون متفهمين، سريعين التحرك، مش دفاعيين لكن بنسمع و بنقدر، مش المفروض تحت أي ظرف نقلل أو نخفف من الوقائع دي، ثالثا ان لازم التغيير ييجي من النفس، دايما خليك واعي براحة أو عدم راحة الطرف اللي قدامك. و دايما اسأل و استأذن و استفسر. بقول الكلام ده لنفسي قبل أي حد، كل الدعم لكل ست شجاعة قررت تتكلم و كل الدعم لكل ست لسة مش قادرة تتكلم”.
حذف اسم المؤلف من التتر
وفي سياق متصل، قد أعلنت أسرة مسلسل فخر الدلتا عن حذف اسم المؤلف من تتر العمل، وذلك بعد الاتهامات المنسوبة له مؤخرًا.
ونُشر البيان الرسمي على صفحات موقع التواصل الإجتماعي، وقالت أسرة المسلسل من خلاله: “تود أسرة المسلسل أن توضح أنها أطلعت على المنشورات المتداولة عبر منصات التواصل الإجتماعي بخصوص عضو في فريق الكتابة، وإذ نؤكد أننا نأخذ مثل هذه الأتهامات على محمل الجد، فقد تقرر إزالة اسم المذكور من تتر العمل مؤقتًا، وذلك إلي حين التحقق من صحة ما يتداول واتخاذ الإجراءات المناسبة بناءًا على ما تسفر عنه نتائج التحقيق، وتؤكد أسرة العمل احترامها الكامل وحرصها على أن ينال كل ذي حق حقه، في إطار من العدالة والشفافية”.
