قاطعت أبويا 10 سنين وياريتني ماتجوزت .. أبرز تصريحات شيماء سيف مع نيشان
حلت الفنانة شيماء سيف، ضيفة على برنامج Neshan X، الذي يقدمه الإعلامي اللبناني نيشان، عبر قناة الجديد اللبنانية.
وخلال اللقاء أباحت شيماء سيف، بالعديد من الأسرار الشخصية، منها مقاطعتها لوالدها لمدة 10 سنوات وطلاقها من زوجها المنتج محمد كارتر ورأيها في تكرار تجربة الزواج مرة أخرى.
قاطعت والدي 10 سنوات
وقالت شيماء عن والدها : "قاطعت والدي 10 سنوات .. ووالدتي عمرها ما طلبت إني أقاطعه .. بدليل إن إخواتي كانوا على طول بيتواصلوا معاه .. وقاطعته بعد أما حصل بيننا موقف وقلتله مش عايزة أتكلم .. وده ماكنش بس دفاعاً عن والدتي .. ولكن في حاجة باظت في حياتي".
وعن سبب مقاطعتها لوالدها : "صحيت الصبح قالولي بابا مشي .. وكنت بحسب إنهم بيهزروا .. ولحد النهارده معرفش مشي ليه .. وماما مش بتحكي .. وصعبت عليا وكانت زعلانة .. وفي نفس الوقت أنا كمان حياتي باظت .. وفقدت الثقة في كل الناس .. وقلت لما أنا أبويا سابني ومشي هستنى من مين يبقى ؟".
شيماء سيف تعلق على طلاقها
أما عن طلاقها، أكملت شيماء سيف : "ياريتنا ما أتجوزنا أصلًا .. وياريتني ماتعشمت إني هلاقي حد يعوضني .. والظروف ماسمحتش بده .. ومش هلومه خالص هوا أحسن حد في الدنيا .. بس الظروف ماسمحتش".
مش عايزة أتجوز تاني
وأضافت : "مش عايزة أتجوز تاني ومفيش حب في حياتي .. وأنا رافضة الارتباط .. ومريت بتجربة اكتشفت فيها مشاكلي كبيرة والشخص اللي ارتبطت به كان عنده مشاكل .. وكل المشاكل دي أثرت عليا .. ولكن لسه معرفش إيه اللي ممكن يحصل قدام .. ومش هرجع أنا وكارتر وده قرار نهائي".
خلاف شيماء سيف مع إحدى الفنانات
كما كشفت شيماء عن خلافها مع إحدى الفنانات التي كانت تحبها، حيث قالت : "عندنا واحدة زميلتنا هي أكيد مش عارفة أنا مابحبهاش ليه .. هي عاملة نفسها إنها صريحة وجريئة وأنا كنت بحبها جدًا .. وفجأة قفلت منها قفلة وهي هتعرف دلوقتي إن أنا بتكلم عنها .. وكانت بتقولي قدام جوزي إنها عارفة واحدة تخينة زيي وماخلفتش غير لما خست .. وتعالي أوديكي عند الدكتور اللي خست عنده .. فأديتني طلقة في قلبي .. وماكنتش عايزة أبين إني متضايقة بس أنا كنت جوايا بتقطع".
نفسي أتنقب وأبعد عن الفن
وتحدثت شيماء سيف كذلك خلال الحلقة، عن رأيها في تحريم الفن، كما فجرت مفاجأة حول نيتها الاعتزال وارتداء النقاب، قائلة : "نفسي أتنقب وأبعد عن الفن خالص وأبقى مع نفسي .. ومش عارفة ليه نفسي اختفي .. ونفسي أتحجب بس لو حصل هتفضل الناس عارفاني كشيماء سيف .. لكن نفسي أتحجب وأبعد عن التمثيل واعتزل السوشيال ميديا .. والقرار ده نابع عن إيمان ومن ساعة ماروحت الحج حسيت إن القرار ده متأخر".
الفن مش حرام
وعن تحريم الفن، تابعت شيماء : "مابشوفش إننا بنعمل أي حاجة حرام .. بالعكس الفن بيغير حاجات في المجتمع وبيقدم حاجات كويسة .. وبتجيلي رسائل زي إن أم كان ابنها شهيد وابنها التاني كلمني وقال إن أمه ماكنتش بتضحك وبقت بتضحك لما تشوفني على التلفزيون .. وحاليًا بقوا صحابي".
