مسلم : يارا مراتي مش حامل وهنتج أغاني لنفسي بعد معاناة 5 سنين
كشف مطرب المهرجانات مسلم، عن فوزه بقضيته ضد منتج أغاني السابق، الذي كان يحاربه على حد قوله في عمله، كما كشف حقيقة حمل زوجته يارا تامر.
مسلم ينفي حمل زوجته يارا تامر
وقال مسلم خلال فيديو له عبر حسابه الرسمي على إنستجرام : "عايز أقولكم على خبر حلو .. والخبر ده أنا ندرًا عليه هدبح عجلين .. وكل الناس اللي عمالة تقولي يارا حامل ولا إيه .. بقولهم الموضوع مالوش دعوة بـ يارا خالص".
معاناة مسلم مع منتج أغانيه السابق
وتابع : “الحمد لله بعد معاناة 5 سنين مع المنتج بتاعي .. والراجل ده كان بيحاول يقفلي أي باب شغل وبيحاربني في أكل عيشي .. وهوا اللي قعدني من اللايف سنة ونص .. وناس كتيرة فرحانة وشمتانة فيا”.
مستعد أنزل كل يوم تراك
وواصل مسلم : “بس أنا حبيت أقولكم إن الحمد لله الدكتور حسام لطفي المحامي بتاعي اللي شقيان معايا بقاله 4 سنين .. الحمد لله كسبت بسببه القضية .. ومفيش حاجة اسمها منتج معايا تاني .. مسلم بقى لوحده .. وأنا راجع راجعة وحشة أوي ومن كتر الغل اللي جوايا .. ومستعد أنزل كل يوم تراك”.
كسبت القضية بدون ظلم
وأكمل : “والحمد لله كسبت القضية بدون أي ظلم .. وقضاء بلدي نصفني وعارف إني اتظلمت .. وإن شاء الله اللي جاي خير وخلال أسبوع هنزل أغنية جديدة .. والحمد لله إن الخبر ده جه قبل رمضان .. وكنت بخلص الألبوم بتاعي .. وبطمن كل الناس اللي بتحبني .. وكل الناس اللي بتكرهني بطمنها برضو .. بس متطمنوش أوي علشان أنا راجع أشتغل قريب .. وهنزل أغاني قريب وأنا اللي هنتج لنفسي .. وهتشوفوا حاجات عمركم ما شوفتوها الفترة الجاية وههتم بشغلي جدًا”.
تصالح مسلم مع منتج أغانيه السابق
واختتم مسلم كاشفًا عن تصالحه مع منتج أغانيه السابق : “وهرجع وأقول بكل أمانة للمنتج اللي كان واقف ضدي أنا مش زعلان منك .. وإحنا انتهينا خلاص من كل المشاكل دي .. وهوا مازال صديقي لحد دلوقتي .. ومش عايز يبقى فيه أي خلاف ما بينا وهوا في الآخر صديقي”.
مسلم يكشف عن تعاونه مع زوجته في فيديو كليب
يُذكر أن مطرب المهرجانات مسلم، كان قد كشف عن مشاركة زوجته يارا معه في فيديو كليب جديد لأول مرة.
وقال مسلم في لقاء عبر عرب وود : "يارا أول مرة تطلع معايا في حاجة .. قلت لها هتظهري في شوت صغير .. هي بتحبني وبتحب تشتغل معايا في أي حاجة"، لترد يارا تامر : "ساعات بتكسف شوية لكن طول ما أنا معاه عادي".
