عيطت بالدموع .. رد فعل ابنة أحمد زاهر بعد مسح لعبة روبلوكس |خاص بالفيديو
كشف النجم أحمد زاهر، خلال ندوة تكريمه بموقع “نيوز رووم”، عن نجاح مسلسله لعبة وقلبت بجد، رد فعل ابنته الصغري نور، بعد مسحه للعبة روبلوكس، التي كانت تحرص على لعبها بشكل يومي.
أحمد زاهر يكشف كيف تعامل مع لعب ابنته لعبة روبلوكس
وقال أحمد زاهر خلال الندوة :"أول أما قرأت سيناريو مسلسل لعبة وقلبت بجد سألت البنات في البيت تعرفوا حاجة اسمها روبلوكس ؟ .. ومنى قالتلي إنهم بيلعبوها كل يوم .. وكلمتهم عن خطورة اللعبة وحكيتلهم ممكن يحصل إيه بسببها".
نور عيطت بالدموع
وواصل : "منى لأنها قرأت السيناريو كانت متفهمة الموضوع ومسحت اللعبة .. ولكن نور عيطت بالدموع .. روحت ماسح اللعبة وكان قبل أما المسلسل يتصور .. وحتى لو هتعيط مش مشكلة .. هتقعد يومين أو تلاتة تعيط وبعدها تلعب لعبة تانية".
واختتم أحمد زاهر : "لازم يبقى فيه سياسة وصحوبية .. والحتة دي إحنا مفتقدينا أوي .. لأن كل واحد مركز في شغله وبقينا ننسى إننا لازم نصاحب ولادنا .. ودي كارثة .. ولازم نصاحب ولادنا ونسمعهم بس فيه حاجات لازم يكون فيها صرامة .. ومش هنسيبهم يودوا نفسهم في داهية علشان خالص الحنية .. مأنا حنين وكل حاجة بس لازم في وقت تقول فيه لأ".
ترشيح منى أحمد زاهر لمسلسل والدها
وكان قد كشف زاهر، خلال نفس الندوة، كواليس مشاركة ابنته منى في مسلسله لعبة وقلبت بجد، حيث أكد أن ترشيح منى للدور كان من الإخراج والإنتاج الخاص بالمسلسل دون أي تدخل منه، وأنها حضرت للشخصية مع والدتها مدربة التمثيل هدى زاهر.
وقال أحمد زاهر خلال الندوة : "منى اشتغلت مع ماماتها على الدور .. وأنا كنت معاها في المشاهد اللي كانت ما بيننا .. وترشيحها كان من الإخراج والإنتاج .. وقولت للمخرج حاتم متولي حقك تشوف منى تنفع ولا لأ ؟ .. وهو اقتنع بيها والإنتاج شاف إنها مناسبة علشان المصداقية والناس عارفة إنها بنتي”.
تفاصيل مسلسل لعبة وقلبت بجد
مسلسل لعبة وقلبت بجد، يتناول العديد من المواضيع الهامة، التي لا تتطرق إليها الأعمال الدرامية في الآونة الأخيرة، ومنها مخاطر السوشيال في حياتنا وخاصة لعبة روبلوكس على الأطفال.
والمسلسل مكون من 30 حلقة، وبطولة أحمد زاهر، السورية ريام كفارنة، رحمة أحمد، حنان سليمان، عمر الشناوي، دنيا المصري، نادين، حجاج عبدالعظيم، وعدد من الأطفال منهم منى أحمد زاهر وعمر شريف ويوسف صلاح وريمون توفيق، والمسلسل تأليف علاء حسن ونسمة سمير وهبة رجب وهدير الشريف، إخراج حاتم متولي، وإنتاج الشركة المتحدة.
