ياسمين عز عن غلاء الدواجن: «بلاش استغلال الناس بتجيب خزين البيت بالعافية»

ناقشت الإعلامية ياسمين عز في حلقة اليوم من برنامجها «كلام الناس» على شاشة «MBC مصر» ملف غلاء الأسعار، وتطرقت إلى ارتفاع أسعار الدواجن وعدد من السلع الأساسية.

أسعار الفراخ

وقالت ياسمين عز: «الناس كلها متفاجئة من أسعار الفراخ، والتجار بيعلوا الأسعار والفراخ زادت من 30 ل 50 جنيه في أسبوع.. ده حرام ومينفعش وليه الزيادة دي كلها.. الست يعيني تيجي تقولك كنت جايبة البانية بـ 180 بقى بـ 230 ولسه هيزيد، واللي لسه قابض وعايز يجيب خزين شهر رمضان الكريم وعامل حسابة على 2 كيلو بانيه وبعد الغلاء ده ميعرفش يجيب غير كيلو ولا كيلو إلا ربع..  الناس دي تعمل إيه؟».

ووجهت ياسمين عز مناشدة بضرورة السيطرة على الأسواق قبل دخول الشهر الكريم، قائلة: «الفراخ غليت واللي يهم المواطن إن الفرخة سعرها ينزل قبل رمضان، مناشدة للجميع إن يبقى فيه على اليومين الجايين السوق يتمسك شوية والأسعار لو ارتفعت تبقى بنسبة ضئيلة يعني 5 جنيه مش أكتر».

علقت الإعلامية ياسمين عز، على الجدل المثار حول مقترح النائبة أميرة صابر عضو مجلس الشيوخ، بشأن التبرع بالأعضاء والأنسجة، معلنة تأييدها الكامل للفكرة ومنتقدة الهجوم غير المبرر عليها.

مقترح التبرع بالأعضاء

وقالت ياسمين عز خلال برنامجها «كلام الناس» المذاع عبر شاشة «MBC مصر»: «يا جماعة التبرع ده بعد الوفاة وبإذن، هما مش بياخدوا الجثة يسلخوها.. لو أنت مش عايز تتبرع متتبرعش، لكن متهاجمش غيرك اللي عايز، كل واحد حر ويمكن ناس عايزة تنقذ غيرها».

ووجهت ياسمين رسالة دعم للنائبة أميرة صابر قائلة: «أنا متضامنة معاكي يا أميرة، دي حاجة جميلة وفيها إنسانية وثواب، والإنسانيات مفيش كلام فيها».

كما انتقدت ياسمين عز حالة الهجوم على السوشيال ميديا وتصديق الشائعات دون وعي، معقبة: «الناس فاضية لدرجة إن أي حد يكتب أي حاجة يصدقوها ويهاجموا، سيب غيرك يتبرع، اللي عايز يعمل حاجة يعملها».

وفي هذا السياق، أكدت النائبة أميرة صابر، عضو مجلس الشيوخ، على ضرورة تصحيح المفاهيم المجتمعية حول قضية التبرع بالأعضاء، مشيرة إلى أن مصر تعاني من ثقافة مغلوطة في هذا الشأن، مما يتطلب تكاتف الإعلام لنقل المعلومات بشكل صحيح.