بقيت بقارن نفسي بنفسي.. ألفت عمر تكشف عن مشاعرها بعد اختفائها لمدة
أعربت الفنانة ألفت عمر عن سعادتها بتغيير وجهة نظرها عن ذاتها وعن النجاح بمقارنة نفسها بالأخرين، وجاء ذلك بعد فترة من البعد عن الساحة الفنية، وعبرت عن ذلك من خلال حسابها الرسمي على موقع تبادل الصور والفيديوهات إنستجرام.
اختفاء ألفت عمر عن الساحة الفنية
وقالت ألفت عمر في منشورها: “ألف حمد وألف شكر كنت فى الأول بقول أنى لسه جوا الدايرة وبشتغل كويس أوى ونجحت ودخلت وبتقدم وبعمل أدوار رئيسية مهمة فى العمل، وهوبا بقيت جنب النجمة الكبيرة يسرا فى أهم مسلسلاتها قضية رأى عام اللى اهلنى لتقدم أكبر وبقيت فى أهم التكريمات فى مصر والوطن العربى وكمان أغلفة أهم المجلات منهم روتانا والموعد وكلام الناس وكل الناس والأسرة وكتير أوى فى الخليج مش فاكرهم وهكذا، قوم ايه اللعنة تمسكنى بعدها واشتغل بالعافية لحد ما اختفيت خالص و ظروف من بره على من جوه الشغل، الخريطة تتغير تمامًا والاقى نفسى برا الدائرة خالص ومواقف وظروف تخلى أى حد ييأس ويعتزل لكن أولا ربنا كان جنبى كنت بدعى ربنا يوجد لى شغل تانى عشان ما بقاش محتاجة اشتغل ويشيل حب التمثيل من قلبى عشان مابقاش زعلانة لكن ماحصلش سبحان الله”.
تغير تفكير ألفت عمر
واستكملت ألفت عمر حديثها قائلة: “لكن تفكيرى اتغير و ده اللى خلانى اكتب البوست ده انى اكتشفت انى بقيت بقارن نفسى بنفسى مش باللى حواليا أو اللى كانوا معايا على نفس السلمة أو حتى اللى ماكنوش عالخريطة وبقوا مهمين جدا فى الشغلانة، بقيت بقول لكل حد مليون مبروك من قلبى وبقيت ممتنة جدا لربنا وللناس اللى بتشوفنى فى مكانة حلوة استحقها وطبعا بقابل اللى بيشوف حاجة تانية بس مش مجال اتكلم عنهم، بس علمتنى المواقف دى انك هتتشاف مع حد صح ومع حد تانى غلط والعبرة أنك زى ما بتتقبل ده تتقبل التانى أقبل وسامح وصالح الدنيا والمواقف والناس واتسند على ربنا اوى هيوقف لك ولاد حلال فى طريقك وساعد تتساعد، شكرا يارب على كل حاجه حلوه أو نص نص، البوست ده لتوثيق مشاعرى وليا اكتر ما يكون ليكم تحياتى لكل حد حبنى من قلبه ”.
