كانت سابقة عصرها..نورهان تكشف كيف كانت والدتها تحضر لأعياد ميلادها في الطفولة

نشرت الفنانة نورهان مجموعة صور لها من طفولتها مع والدتها التي توفيت أمس، استرجعت فيها ذكرياتها مع الراحلة، ممتنة لتربيتها لها,

وكتبت نورهان عبر حسابها بموقع فيسبوك :"قبل اختراع الـ princess treatment ، كانت أمي سابقة عصرها وعملتهالي.. مامتي كانت بتعمل لي أعياد ميلاد الناس تسناها من السنة للسنة وكانت هي تحضر لها من قبلها بشهر،  وتزين البيت وتعمل البوفيه كله بنفسها والتورتة 3 أدوار كأني عروسة ! ومع أنها كانت بتقف في المطبخ أسبوع كامل قبلها هي وكتب أبلة نظيرة، بس كانت تطلع يوم العيد ميلاد زي القمر كدة برده زي مانتوا شايفين.. معرفش ازاي ويبقى يوم تتحاكي به الأهل والأقارب والجيران.. تقولش الأميرة قطر الندى.. ايه يا مامي كل دا يا حبيبتي".

وأضافت نورهنا: “في بيتنا في إسكندرية فتحت الدولاب طلعت الألبومات.. وأنا باقلب وباضحك وبابكي في نفس الوقت، افتكرت جنب كل صورة الف ذكري غيرها.. جزاكي الله عني كل الخير يا حبيبتي.. ربيتيني ورعيتيني  وفضلتيني علي الكل وعلى نفسك.. احسن مدارس وأحسن لبس وأكبر مكتبة كتب ووقتك كله كان مكرس ليا بكل اهتمام.بافكر دايما لما دلوقتي علماء النفس بيقولوا للأهالي أن الأهم من إنك تشتري لولادك حاجات هو إنك تقضي معاهم  quality time.. وقتك.. ودعمك النفسي.. بافتكر أمي ازاي فعلا بقي مش هزار  كانت سابقة عصرها والنظريات والورش التربوية...  اسألكم الدعاء لها”.