أحمد العوضي : درة حساسة ويارا السكري أكيلة ومش بيبان عليها |فيديو

كشف الفنان أحمد العوضي أسراراً عن أبطال مسلسله الجديد علي كلاي، والمقرر عرضه في موسم دراما رمضان المقبل 2026، كما تحدث عن روتينه الرياضي، وآرائه في العديد من الأمور في الحياة الفنية والشخصية.

أحمد العوضي يكشف عن روتينه الرياضي

وقال أحمد العوضي في لقاء ببرنامج بنك حظ النجوم، عبر حساب cbc الرسمي على إنستجرام : “ بتمرن نفس التمارين طول السنة .. ومفيش حاجة اسمها تعمل عضل بسرعة .. لازم تمشي على نظام غذائي ويبقى في استمرارية في التمرين علشان تكون عضلات”.

هطلع من الدور الشعبي

وعن تركيزه في الدراما الشعبية، تابع العوضي : “بحب لقب ابن البلد .. وعندي مسلسل الأستاذ بعد رمضان هطلع منه من الدور الشعبي خالص”.

وعن تعامله مع المشاكل، أضاف : "بتخانق بس في الحق وممكن أتخانق مع واحد مش صاحبي .. وأنا مع صاحبي سواء ظالم أو مظلوم، وعن الصديق الذي سيذهب مسرعًا للوقوف بجانبه في مشكلة، رد : "عصام السقا".

وواصل أحمد العوضي : “في الخناقات لساني اللي سابق .. ومش بستخدم دراعي إلا لو اللي قدامي استخدمه”.

وعن الجمل اللي يستخدمها في أعماله الفنية، قال : “بلتزم بالسكريبت .. والجمل اللي بقولها مش بتبقى ارتجال بتكون بالاتفاق مع المؤلف والمخرج”.

وعن أدواره، تابع العوضي: “أقدر أعمل دورين مختلفين في نفس الوقت في الدراما والسينما .. وبنتقد نفسي لما بتفرج على أعمالي”.

أما عن الدراسة، أكمل أحمد العوضي : “درست تجارة خارجية بسبب مجموعي .. وممكن عادي حد يدخل التمثيل من غير دراسة .. وأنا كنت بمثل في مسرح الجامعة .. وده اللي أهلني إني أمثل لما أستاذ نور الشريف اكتشفني”.

وعن نصيحته لشباب الجامعة الحاليين، تابع : "ركز في جامعتك وخدت شهادتك وبعدها إعمل اللي أنتا عاوزه في حدود الأدب والأصول بس ميأثرش على مستواك الجامعي، وعن تقديره في الجامعة، قال : "كان تقديري جيد جدًا".

طعام أحمد العوضي المُفضل

كما كشف العوضي عن طعامه المُفضل، قائلًا : “الأكل اللي بيبني عضلي الكبدة ومش لازم تبقى نية .. وباكل سبايسي ومبعرفش أعمل أكل .. والأوردر بتاعي سمك بلطي مشوي ردة مقفول ومعاه رز صيادية .. ولو عايز حاجة تديني باور بشرب مشروب مش باكل”.

حديث أحمد العوضي عن أبطال مسلسله علي كلاي

وعن أبطال مسلسله علي كلاي، قال الفنان أحمد العوضي : “درة حساسة وأي كلمة بتأثر فيها .. وعصام السقا بيندب كتير .. ويارا السكري أكيلة بس مش بيبان عليها”.

تعامل أحمد العوضي مع المهرجانات الفنية

أما عن المهرجانات الفنية، اختتم العوضي : “مابروحش المهرجانات إلا لو أنا مُكرم .. وبلبس بدلة سوداء لأننا وعينا على البدلة السوداء مش الفوشيا .. والفوشيا موجودة بس في المهرجانات بس”.