«هددني بالسكين وطلب 5 آلاف جنيه».. ننشر اعترافات المتهم بقتل نجله بالمنيا|خاص
كشفت تحقيقات النيابة العامة في القضية رقم 17045 لسنة 2025 جنايات سمالوط غرب، والمقيدة برقم 2514 لسنة 2025 كلي شمال المنيا، والمتهم فيها "جمال.م"، بقتل نجله بسبب تعاطيه المخدرات وتشاجره الدائم مع الأهالي والجيران، حيث انتهز فرصة تعمق نجله في النوم، وتعدى عليه بقطعة حديدية على رأسه، ما أودى بحياته.
اعترافات المتهم بقتل نجله بالمنيا
وحصل موقع «نيوز رووم» على نص التحقيقات من أقوال «جمال.م» المتهم بقتل نجله والتي جاءت كالتالي:
س: ما هي تفصيلات إقرارك تحديداً؟
ج: اللى حصل أن ابنى مصطفي كان عامل مشاكل كتيره فى شغله في القاهرة ومع الناس في البلد وبدأ يهددني انا وامه انه هيموتنا بسبب المخدرات اللي هو بيشربها ومراته سابتله البيت وراحت عند بيت ابوها وكان بيجي يبات عندي فى البيت واى حد من ولاد عمي كان بيجي يبات معاه عشان ياخدوا بالهم منه واحنا نايمين، وبعد كده أخدته انا وامه كشفناله فى المنيا وكنا عاوزين ندخله المصحه ويوم الخميس كان عندي في البيت واتعشى معايا انا وامه واخوه الصغير وبعد كده دخل ينام واحنا دخلنا ننام وحوالى الساعة 12 بالليل لقيته فتح عليا باب الاوضه فصحيت ولقيته ماسك سكينه في ايده فقولتله عايز ايه يا ابني قالي انا عايز خمس آلاف جنيه دلوقتي والا هدبحك انت أو أمي.
ولقيته مسكني من الجلابية وطلعني برة الأوضه وفضل يهددني بالسكينة ولقيته ضربني بالقلم فجريت من قدامه لقيت رجل كرسي حديد على الارض في الصالة أخدتها وفضلت أضربه بيها على راسه لحد ما وقع على الارض سايح في دمه ومات، فسبته وقعدت على الدكه في الصالة مش عارف اعمل ايه، وكان لازم اخفى الجثة بتاعته قبل ما حد شوفه، فرنيت على ابني هشام وقولتله هات التروسكل بتاع جوز أختك وتعالي ليا البيت ولو سألك قوله هننقل بيه شويه سماد وخلال ساعة لقيته بيرن الجرس فطلعت فتحتله الباب ودخل لجوه وشاف مصطفي أخوه واقع على الارض فى الصاله قدام المطبخ ومتعور فى راسه وسايح في دمه فأغمي عليه أول ما شافه وبعد كده فوقته وحكيتله اللي حصل وقولتله غيتني احنا لازم نخلص من المصيبة دي، فدخلت جبت شوال بلاستيك ولفيت مصطفى بيه وشلته حطيته فى الصندوق بتاع التروسكل وقلت لابني هشام تعالى سوق التروسكل عشان مش بعرف أسوق، وركبت جنبه وقلتله اطلع بينا على قرية الشيخ تلاده نرمي الجثة فى البحر اليوسفي ونرجع، فرحنا على هناك ووقفنا بالتروسكل جار البحر وانا نزلت شلت مصطفى من صندوق التروسكل ورميته فى البحر ورجعنا على البيت، وقولت لابني هشام روح أنت رجع التروسكل مكانه وارجع بيتك، وتانى يوم صحيت فضلت قاعد فى البيت بتاعي لحد ما لقيت الحكومة دخلت عليا البيت حوالى الساعة ٨ بالليل، فتشوا البيت ولقيتهم جابوا ابني هشام من بيته واخدونا على المركز وعرفت انهم لقوا جثة ابني مصطفى في البحر ولما سألوني حكتلهم على اللي حصل وفضلت هناك لحد ما جابونى على هنا وده كل اللي حصل.
س: متى واين حدث ذلك؟
ج: الكلام ده حصل يوم الجمعه الموافق ١-٨-٢٠٢٥ حوالى الساعة ١:٠٠ صباحاً - فى بيتي بقرية منشية بدينى -مركز سمالوط غرب.
