زوجته تركته بسبب المخدرات.. أقوال والدة ضحية القتل على يد والده بالمنيا|خاص
كشفت تحقيقات النيابة العامة في القضية رقم 17045 لسنة 2025 جنايات سمالوط غرب، والمقيدة برقم 2514 لسنة 2025 كلي شمال المنيا، والمتهم فيها "جمال.م"، بقتل نجله بسبب تعاطيه المخدرات وتشاجره الدائم مع الأهالي والجيران، حيث انتهز فرصة تعمق نجله في النوم، وتعدى عليه بقطعة حديدية على رأسه، ما أودى بحياته.
أقوال والدة ضحية القتل على يد والده بالمنيا
وحصل موقع «نيوز رووم» على نص التحقيقات من أقوال «عواطف.ع» والدة المجني علي والتي جاءت كالتالي:
س: ما هي صلتك وعلاقتك بالمجني عليه المتوفي مصطفى؟
ج: مصطفى يبقي ابني.
س: وما هو سن نجلك المجنى عليه سالف الذكر تحديداً ؟
ج: هو كان عنده حوالي ٣٦ سنة.
س: وما هو المؤهل الدراسي لنجلك المجني عليه سالف الذكر؟
ج: مصطفى خلص تالته إعدادى ومكملش فى المدرسة.
س: وما هى الحالة الاجتماعية لنجلك المتوفى الى رحمة مولاه تحديدا؟
ج: هو متجوز حسناء من حوالى خمس سنين وجايب منها واد وبنت الولد اسمه محمد والبنت اسمها جودي.
س: واين كان يقطن نجلك المجني عليه تحديدا؟
ج: هو قاعد فى بيت لوحده غرب البلد.
س: ومع من يقطن نجلك المجني عليه بذلك المسكن؟
ج: هو قاعد مع مراته وعياله.
س: وهل كان نجلك المجني عليه يعمل بأي عمل؟
ج: هو كان بيشتغل فى فرن عيش فى مصر.
س: وما هي معلوماتك بشأن الواقعة محل التحقيق تحديداً؟
ج: اللي حصل ان ابنى مصطفى كان بيشرب مخدرات من حوالى فترة كبيرة وكان دايما بيعمل مشاكل مع الناس فى الشغل وفى البلد ومن حوالى اربع سنين ودناه مصحه قعد فيها شهرين وبعد ما طلع رجع للمخدرات تانى وودناه مصحه تانية وبرضوه بعد ما خرج منها رجع شرب مخدرات تاني وعمل مشاكل مع مراته لحد ما سابت البيت وراحت عند اهلها ومن حوالى شهر رجع البلد وكل يوم والتانى يعمل مشكلة مع الناس فى البلد ومن حوالى أسبوع كان يجيلنا البيت ومعاه سكينه ويهددنى أنا وأبوه انه هيموتنا، فأخدناه ورحنا كشفناله فى المنيا وقالولنا هاتوه بعد أسبوع عشان يدخل المصحه ويوم الخميس أول أمبارح جه اتعشي معانا فى البيت ومشي واحنا دخلنا نمنا لحد ما قلقت تانى يوم الصبح يوم الجمعه دخلت الحمام ورجعت أوضتى نمت تاني ومصحتش غير على المغرب والحكومة عندنا فى لبيت ولقيتهم واخدين جوزى وبيفتشوا البيت وأولادى البنات اللى مجوزين فى البلد سمعوا ان عندنا حكومة جم وبعد كده هشام ابنى جه البيت عندنا والحكومة اخدته برضوه ومشوا بيهم على المركز وقعدت انا واولادى البنات فى البيت وبعد شوية الحكومة رجعت تانى واخدتنى أنا واولادى البنات على المركز قعدونا فى مكتب حوالى ساعتين وبعدين قالولنا روحوا فرجعنا البيت وانهارده شيخ الخفر جانى البيت وقالى عاوزينك فى النيابة فجيت على هنا وعرفت ان ابنى مصطفى اتوفي وهو ده كل اللى حصل.
س: متي وأين حدث ذلك؟
ج: أنا معرفش ابنى مصطفي مات امتي.
