«الحروق مش لعبة».. هبة السويدي تحذر من انتشار تحدي الماية والشاي المغلي
حذّرت الدكتورة هبة السويدي، مؤسس ورئيس مجلس أمناء مؤسسة ومستشفى أهل مصر لعلاج الحروق من ظاهرة «تحدي الماية والشاي المغلي»، مُشيرة إلى عدم استيعابها من الفيديوهات المتداولة على منصات التواصل الاجتماعي.
وكتبت في منشور لها عبر موقع «إنستجرام»: «بجد عقلي مش قادر يستوعب يعني إيه تحدي الماية والشاي المغلي يكون ترند و كل فيديو يوصل لـ 7 مليون مشاهدة».
وتابعت: «دي صور لأطفال اتحرقوا بسبب الماية والسوائل المغلية، أطفال عاشوا بتشوهات هتفضل معاهم طول العمر، وأطفال بقالهم شهور في الرعاية المركزة، و على جهاز تنفس صناعي».
وأضافت: «وأطفال جالهم عدوى وتسمم في الدم لأن الماية كانت ملوثة، واتنقذوا بعد معاناة شهور طويلة، وأطفال اتوفاهم الله، لأن ماكنش عندنا سرير فاضي في مستشفى أهل مصر نستقبلهم، والمكان اللي كانوا فيه أهمل علاجهم، و حصلهم تسمم في الدم، رغم إن الحرق كان في حتة صغيرة من الرجل و من ماية مغلية مش أكتر».
واختتم منشورها بنداء قائلة: «كفاية بقى تريندات و كفاية استسهال وجري ورا المشاهدات، ارجوكم الحروق مش لعبة و الحروق مش تحدي».
وفي وقت سابق أعربت الدكتورة هبة السويدي مؤسس مستشفى أهل مصر للحروق عن سعادتها بتسلُّمها جائزة الأم تيريزا العالمية للعدالة الاجتماعية، بالنيابة عن مصر.
جاء ذلك في منشور لها عبر موقع التواصل الاجتماعي «فيسبوك»، قائلة: «أيقنت أن الله يجبر خاطري، لما بكيت ولم أجد إلّاهُ».
وأضافت: «ربنا دايما بيطبطب على قلبي والسنة دي يوم عيد ميلاد ابني إسماعيل الله يرحمه اداني تكريم لم اكن اتوقعه وكانها رسالة من ابني ولابني، ربنا بيقولي انه حاسس بيكي وثواب عملك بيوصله وذكرى ميلاده هتتحول لذكرى يتوج بيها رحلة كفاح وتعب مع المرضى والناجين من الحروق».
وتابعت: «ممتنة ومتشرفة بتسلُّم جائزة الأم تيريزا العالمية للعدالة الاجتماعية، بالنيابة عن مصر وعن كل مريض وناجي من الحروق وعن فريق اهل مصر».
وأوضحت: «تكريم لقضية كانت مجهولة تماما خصوصا في مصر و العالم العربي والأفريقي.. قضية تستحق الكرامة والأمل، ولحظة قريبة جدًا لقلبي لأنها بتوافق يوم ميلاد ابني إسماعيل رحمه الله».
واختتمت: «لأؤمن أكتر إن اللي بيتقدَّم بنية خالصة و بيقين و محبة بيفضل أثره مدى الحياة».
