«ماتخليش الغش يسرق منك بركة العلم».. الأوقاف توجه رسالة للطلاب مع الامتحانات
وجهت وزارة الأوقاف رسالة للطلاب تزامنا مع امتحانات نصف العام 2025/2026، مؤكدة أن الغش ليس لحظة نجاة بل بوابة كبيرة تدخّل منها الهزيمة على النفس، وأن الثقة التي يخسرها الطالب تظهر أمام كل مرآة ينظر إليها.
التعليم مش عذاب والامتحان مش خصومة
وقالت الأوقاف ضمن صحح مفاهيمك: «اللي بيغش مش عاجز عن الفهم ولا فاقد للقدرة، لكنه محتاج يعيد اكتشاف معنى التعلّم، وليه بيدخل التجربة دي من الأساس. في ناس فاكرة إن التعليم مجرد قيود ثقيلة بتخـ.نق الطموح، ومسار مفروض بيقـ.تل الشغف، وإن الغش هو طوق النجاة من عذاب ملوش معنى. بس الحقيقة؟ التعليم مش عذاب، والامتحان مش خصومة، واللي بيمنع الغش مش قاسي، ده بيحاول ينقذك من إنك تخرج للحياة من غير سلاح».
الغش يهدم قيمتك من الداخل قبل ما ينجّحك
وتابعت: «الغش بيهدم قيمتك من الداخل قبل ما ينجّحك، ويزرع جواك فكرة خطيرة إن النجاح ممكن يتحقق بالخداع. وبيخليك تشوف التعب ظلم، والنظام قهـ.ر، والمعلم خصم.. الغش مش تيسير ولا شفقة، الغش سقوط أخلاقي. سقوط في حق نفسك، وأهلك، وزمايلك، ووطنك اللي بيحاول ينهض بيك. واللي بيكسب حاجة بالغش، سواء مركز أو وظيفة أو أي منفعة، فده بيخلي شبهة الحرمانية تظل ملازمة لكل ما يكسبه مدى حياته، حتى لو باين عليه النجاح من الخارج. وربنا سبحانه وتعالى قال: {وَلَا تَبْخَسُوا النَّاسَ أَشْيَاءَهُمْ} [الأعراف: ٨٥]».
وأكدت وزارة الأوقاف أن الغش نوع من البخس، بخس للحق، وللعدل، وللجهد الحقيقي، مضيفة: «ولو كنت فاكر إنك مش قد التعليم.. اسمعني كويس: انت مش ضعيف، بس محتاج تفهم إن العلم نور بيحررك من الجهل، وبيفهمك نفسك والدنيا وربك.
واختتمت: «ابدأ من النهاردة: واجه امتحانك بصدق. سيب بصمة شريفة، حتى لو درجتك قليلة. ماتخليش الغش يسرق منك بركة العلم ولا احترامك لنفسك».
دعاء لتطهير النفس من الغش
داعية اللهم طهّر قلوبنا من الخيانة، ونفوسنا من الغش، وارزقنا فهمًا يُرضيك ونجاحًا من فضلك.
