كان وزير داخلية عظيم.. مدحت شلبي يكشف علاقته بـ حبيب العدلي

كشف الإعلامي مدحت شلبي، عن طبيعة علاقته بحبيب العدل، موضحًا: «وزير الداخلية الأسبق حبيب بيه العدلي كان رجل محترم جدًا وكان وزير داخلية عظيم جدًا، وحتى مع الهوجة اللي حصلت سنة 2011، خرج منها تمامًا ومبرأ من كل شيء».

قال شلبي خلال لقائها مع الإعلامية أميرة بدر: «أنا بحترمه جدًا، وبحترمه كوزير، لأني كنت وقتها ضابط في قطاع الشرطة، وكنت شايف بعيني أداء وزارة الداخلية، وأداء الشرطة، وأداء الضباط، وأداء الأمن العام، كان واضح جدًا، والبلد كانت ماشية بنظام، والأمن مستتب، وكل حاجة في مكانها الصح، وكمان اختياراته للقيادات كانت موفقة جدًا، والفترة دي شهدت القضاء على الإرهاب، وكان بيواجه الجماعات الإسلامية بأسلوب مختلف وجديد تمامًا».

وأضاف: «أنا كمان ليّا معاه موقف شخصي مهم، أنا كنت وقتها في قطاع الشرطة الرياضي، وبدأت أشتغل مذيع في التلفزيون وبدأت رحلة التعليق».

وعن كيفية السماح له بالعمل الإعلامي، أوضح: «بتقدم طلب لوزارة الداخلية عن طريق العلاقات العامة، والطلب بيتعرض على الوزير، ولو شايف إن البرامج الرياضية مناسبة، بيوافق، وأنا وقتها كنت في قطاع الشرطة، وقلت في طلبي إني كمان هغطي أنشطة القطاع، والحمد لله الطلب اتقبل».

وتابع: «بعد كده جه دوري في الترقية، كنت قضيت سنتين عميد، وكان المفروض أترقى لواء، ولو ما حصلش كنت هضطر أستقيل، لأن كان فيه قرار إن اللي قضى 20 سنة في المناطق المركزية لازم يطلع منطقة نائية، وأنا كنت قضيت 20 سنة في الداخلية، وطلوعي منطقة نائية كان هيأثر على شغلي في التلفزيون، خصوصًا إني كان عندي برنامج أسبوعي، ولو اختفيت شوية كنت هتستبعد تمامًا».

وأردف: «وقتها كنا داخلين على صراعات رهيبة في مبنى التلفزيون، فقلت له بصراحة: لو ما اترقيتش لواء، مش هاخد صندوق الشرطة، وصندوق الشرطة وقتها كان 120 ألف جنيه، ودي كانت ثروة بالنسبة لي في الوقت ده، وكمان كنت هتنازل عن معاش اللواء، فطلبت منه الموضوع بشياكة وقابلته وقلت له لو أمكن أترقى لواء وأطلع، ده هيكون أفضل لي بكتير».

وردًا على سؤال المذيعة عما إذا كان ذلك استثناءً، قال شلبي: «لا، مكنش استثناء ولا حاجة، كان إجراء عادي جدًا، طلعت لواء، واللواء ما ينفعش يشتغل، وخرجت زي آلاف الناس اللي طلعت في نفس الفترة، بشكل طبيعي جدًا».