عمرو أديب يطلق نداء إنساني لإنقاذ شيرين عبد الوهاب: «محتاج حد يتدخل»
علق الإعلامي عمرو أديب على شيرين عبد الوهاب، قائلا:" أنا بوجه كلامي لحد يقدر يعمل حاجة، في الدولة المصرية، شيرين محتاجة حد يتدخل، شيرين محتاج حد يعملها حاجة.
مشكلة شيرين
وتابع، خلال تقديمه برنامج الحكاية، والمذاع عبر قناة إم بي سي مصر:"أغلبنا نعرف تقريبا ايه مشكلة شيرين، ويا نلحقها يا منلحقهاش، وأرجوك متقوليش أنا حاولت قبل كده، أنا بتكلم من واقع اتصالات اليوم، أنا مقدرش اعمل حاجة أنا عايز الحق شيرين، الكلام يضايق، وممكن يضيايق شيرين نفسها، أنا عايز اطلع كداب، وتكون شيرين كويسة".
وأضاف:" في ناس عارفة شيرين فين، أنا بكلمك عن حالة إنسانية، انقذوها يا جماعة، حد ممكن يقولي ممكن ما تبقاش عايزه، هو ده بالعوز؟؟!، أنا بقولك محتاجة حد يتدخل، انتوا في البلد دي متعرفوش تدخلوا!!، أنت فالبلد دي لو عايزين هتعملوا، نحاول يا جماعة، الحقوا شيرين، يكفيك شرف المحاولة.
واستطرد:"ارجوكم، اتوسل ايدكم، مفيش وزارة مسؤولة عن الكلام ده، وزارة التضامن الاجتماعي، مفيش دكتور، مستشفى، الناس ما تتسابش كده يا جماعة!!.
أغاني شيرين عبد الوهاب
وفي وقت سابق، قال الإعلامي عمرو أديب، إن أغاني شيرين عبد الوهاب مقفول عليها، إلا بطرق غريبة، وأغانيها العظيمة غير موجودة، هي شيرين فين، حالتها الاجتماعية إيه، نشاطها فين؟ شيرين مختفية، شوية بيان يطلع ويقولك ده صوتها، وبعدين يقولك ده AI، شيرين بتخلص، أنا معرفش مرتبطة بمين، محدش يعرف حاجة، شيرين دي ثروة مصرية، شيرين فين يا جماعة؟
وأضاف خلال برنامجه الحكاية عبر شاشة إم بي سي مصر:"محدش عارف يوصل لها، ومحدش يعرف، هل هيدا عادي؟ على رأي إخوانا اللبنانيين، أنا بدق ناقوس الخطر، ولو سمعاني اتكلمي يا شيرين، ردي عليا يا شيرين، أول مرة شيرين طلعت في التليفزيون كانت معايا وآخر مرة كانت معايا، حاجة جبارة، شيرين لن تتكرر، أنا بتكلم عن القوة الناعمة المصرية، مصر ولادة، بس مش بالسهولة.
