من تلامذته.. رامي إمام يكشف رحلة نجاح مايا ابنة أشرف زكي: مشوار صعب وفخور بيها

أشاد المخرج رامي إمام بموهبة المخرجة الشابة مايا أشرف زكي، ابنة نقيب الممثلين، معبرًا عن فخره لها بأولى تجاربها في الإخراج من خلال مسلسل حد أقصى بطولة والدتها الفنانة روجينا والمقرر عرضه في الموسم الرمضاني المقبل.

وكتب رامي إمام عبر حسابه بموقع إنستجرام: “النهارده بكتب كابشن مش متعود أكتبه… ومليان مشاعر مش عارف أوصفها .. يمكن لان أول مرة هقول بإحساس غريب كده إن في حد طالع من “مدرستي” وأنه من “تلامذتي “ وأنا اللي لسة بتعلم لحد دلوقتي .. البنت دي أنا حضرت وشوفت رحلتها خطوة خطوة. إحساس صعب، كبير”.

وأضاف رامي إمام":"من 13 سنة، مايا زكي كان عندها 17 سنة (طبعاً هي هتخنقني علشان قولت سنها) كانت لسه طالبة في أولى معهد سينما قسم إخراج.
ابوها أشرف زكي حبيب قلبي، سلّمها لي وقال لي: “دي بنتك… من فضلك بهدلها معاك” ومن اللحظة دي، شفت بنت صغيرة جدًا جدًا وهي بتكبر قدامي في المجال".

وتابع رامي إمام: "بدأت معايا مساعدة صغيرة، واتعلمت، واجتهدت، واترقّت… من مساعدة لمساعدة أولي وشالتني كتير لحد ما النهارده بقت مخرجة في اول عمل ليها السنة دي، في رمضان 2026 إن شاء الله ، ومع مين .. مع أمها، حبيبتي الغالية روجينا.. أيوة هي من عيلة فنية كبيرة رحلة كاملة شفتها بعيني، بكل تعبها وبكل لحظة قوة وضعف".

وأكمل: “الفخر اللي حاسس بيه مش عادي… مش بس عشان وصلت، لكن لأنها تستحق فعلًا المكان اللي هي فيه. عندها شخصية قيادية، حضور، ووعي يخليها مش مجرد مخرجة، لكن واحدة من المخرجات الكبار في مصر إن شاء الله”، مختتمًا: “بحبك، وبشجعك من قلبي، وواثق في اللي جاي أكتر من أي وقت فات”.