سرقت محفظة بسبب فيلم لوالدي .. رامي إمام يكشف تأثره بالزعيم في طفولته
كشف المخرج رامي إمام، عن تأثره بوالده الزعيم عادل إمام في طفولته، حيث روى أنه سرق محفظة أحد زملائه في المدرسة، بسبب مشاهدته لفيلمه المحفظة معايا، الذي عُرض في عام 1978، مشيرًا إلى غضب والده منه وضربه له بسبب ما فعل.
تأثر رامي إمام بفيلم المحفظة معايا
وقال رامي إمام خلال بودكاست فضفضت أوي، الذي يقدمه المخرج معتز التوني، عبر منصة WATCH IT : "أبويا كان عامل فيلم المحفظة معايا وكان طالع فيه نشال .. بينشل المحافظ من الناس في الأوتوبيسات .. وشوفت الفيلم وتأثرت بيه جدًا .. ولما كنت في أوتوبيس المدرسة كان حد من زمايلي معلق الجاكيت .. روحت حاطط إيدي وواخد المحفظة في جيبي تأثرًا بالفيلم .. وبعدها الولد قعد يقول مش لاقي المحظفة .. والدادة فتشتني ولقت المحفظة معايا .. والسواق قال للدادة اللي عندي في البيت على اللي عملته".
أول قلم من عادل إمام لنجله رامي إمام
وتابع رامي : "على حظي أبويا كان يومها في البيت .. وقولت أبويا هيتعامل معايا عادي وهياخد الموضوع كإفيه .. وده كان أول قلم أبويا يديهوني".
أبويا في البيت أب مصري حازم
واختتم رامي إمام : "أنا بقول الكلام ده علشان الناس ممكن تفتكر إن الراجل ده مهرج وقاعد في البيت مقضيها إفيهات .. لكن هوا عكس كده تماماً .. أبويا في البيت هو الأب المصري الحازم .. وبالنسباله المذاكرة مذاكرة .. ومفيش حاجة اسمها متذاكرش أو متتعلمش .. التعليم هو الأساس .. ويعني إيه إنك تبقى فاشل .. وأمي كانت بتقولو لو سقطت في امتحان وكان بيحاسبني".
عادل إمام يهنئ محبيه بالعام الجديد
يُذكر أن الصحفة الرسمية للزعيم عادل إمام، على فيسبوك، كانت قد نشرت تهنئة لمتابعيها وجمهور الزعيم الكبير، بمناسبة رأس السنة الجديدة، مرفقة بصورة للزعيم، وتفاعل معها المتابعون متمنين لراسم البهجة عاماً سعيدًا.
