أحمد سالم عن جدل القرآن قبل الصلاة: «في كل الأحوال هتتشتم»
علق الإعلامي أحمد سالم على الأزمة المتداولة في الوقت الحالي بشأن إذاعة القرآن الكريم في مكبرات الصوت بالمساجد قبل الآذان والصلاة.
جاء ذلك في منشور له عبر موقع التواصل الاجتماعي فيسبوك، قائلا: «فيما يخص موضوع القرآن في الميكروفونات قبل الصلاة تبين لنا مايلي، لو وافقت و قلت انك بتحب تسمع القرآن طول الوقت وفي أي مكان هتتشتم عشان انت متشدد و متنطع و معندكش إحساس بالآخر يا عدو الله، ولو رفضت وقلت إن اللي عايز يسمع قرآن يسمعه في بيته او عربيته او في سماعة أذن احتراما للمرضي و كبار السن و غير المسلمين، هتتشتم و يتقالك يا كافر يا ملحد يا عدو الدين».
وأضاف: «واشمعني ما قلتش حاجة عن دوشة وإزعاج الدي جي و الأفراح و الباعة الجائلين، أما لو قلت انك رافض أي ضوضاء بما فيها الدي جي والأفراح والباعة الجائلين ، اوعي تفتكر انك هربت من الشتيمة والإهانة لأنك برضو هتتشتم و يتقالك انت ازاي تقارن سماع القرآن بالدي جي وكده يا كافر يا ملحد يا عدو الله، طب لو استعنت بآراء دار الإفتاء المصرية اللي بترفض إزعاج الميكروفونات، كده هتدخل في اتجاه جديد من الشتيمة وهو انك خاين وعميل و بتسمع لشيوخ السلطان،
طب لو دخلت عليهم بمجموعة آراء كبار رجال الدين من كل الاتجاهات وأشهرهم الشيخ الشعراوي هنا بقي تبقي وقعت في المحظور و انكشفت يا علماني يا حقير ياللي سايب كل فتاوي العلماء وبتختار اللي علي هواك، و برضو هتتشتم»
وختم سالم بقوله: «يبقي الحل انك تحتفظ برأيك لنفسك احتراما لنفسك، أحب اقولك انك برضو هتتشتم عشان كتمت الشهادة يا عدو كل حاجة».
