ياسمين عز: منتخب مصر على قلب رجل واحد.. وأوضة اللبس قوية

 أكدت الإعلامية ياسمين عز، أن كل ما يُثار حول خلافات في تشكيل المنتخب أو الأساسي والمُرشح للعب مجرد شائعات، مشددة على أن «منتخب الفراعنة دلوقتي على قلب رجل واحد».

 وقالت ياسمين عز خلال برنامجها «كلام الناس» المذاع على قناة إم بي سي مصر:«أي حدة بيطلع أشاعات أن في اختلاف على التشكيل ومين أساسي ومين حاس مرمي، ننسي الكلام ده، منتخب الفراعنة دلوقتي على قلب رجل واحد أوضة اللبس بتاعتنا قوية جدا، وأنا شوفتها بنفسي من مصادرنا الخاصة، حاجة أخر شياكة  يطلع حد يقولك أنا خايف أوضة اللبس تبوظ ومش عارف إيه، عادي جدا لو باظت هنشوف أوضة تانية، متقلقوش واطمنوا، أوضة لبس المنتخب تمام».

تألق صلاح

وأضافت: «محمد صلاح إن شاء الله هيتألق في البطولة دي ويعمل أحسن حاجة، خدو مني ومترجعوش وراه، الأسطورة محمد صلاح هيثبت لليفربول إنه أحسن لاعب في العالم».

وعن المدرب حسام حسن، قالت: «أي حد بضايق من عصبية الكابتن حسام حسن أحب أقولكم دي مش عصبية ده حماس لبلده وعاوز يفرح 120 مليون مصري، وكلنا ورا العميد».

ووجهت ياسمين نصائح للاعبين: «ربنا يحرصكم من الإصابات ويحرصكم ومن العين والخناقات ويبعد عنكم الكارت الأحمر والإنذارات، ونبي خدو بالكم واهتموا بالكرة الجماعية أرجوكم، ارجعولنا بالكأس».

مفيش أهلي ولا زمالك 

وفي نف السياق، أكدت الإعلامية ياسمين عز أن منتخب مصر يدخل بطولة كأس الأمم الإفريقية بروح واحدة بعيدًا عن أي انتماءات كروية، مشددة على أن «مفيش أهلي ولا زمالك وقت ما المنتخب بيلعب».

وقالت ياسمين عز، إن منتخب مصر يستهل مشواره في البطولة بمواجهة زيمبابوي، ضمن مجموعة تضم أيضًا جنوب إفريقيا وأنجولا، معتبرة أن لقاء زيمبابوي «مضمون»، بينما تبقى مواجهة جنوب إفريقيا هي الأصعب.

وأضافت أن منتخب جنوب إفريقيا يعتمد على الاستحواذ والتمريرات القصيرة، قائلة: «فاكرين نفسهم برشلونة وبيعملوا تيكي تاكا»، مشيرة إلى أن الحل الأمثل للمنتخب المصري هو التنظيم الجيد في وسط الملعب وعدم الاندفاع، مع الاعتماد على الهجمات المرتدة السريعة.

وتابعت: «باصي لمحمد صلاح أو مرموش، وهما هيخلصوا الهجمة، لأن دفاعهم مش قوي»، ووجهت ياسمين عز رسالة مباشرة للجماهير مع انطلاق المباراة، قائلة: «أول ما الحكم يصفر الساعة 10، مفيش حاجة اسمها أهلاوي أو زملكاوي.. الزمالكوية يشجعوا زيزو وإمام عاشور، والأهلاوية كدا كدا بيحبوا زيزو وإمام عاشور، لازم نبقى كلنا على قلب رجل واحد».