محمد رمضان : حفلتي في أمريكا يوم 17 يناير وميعادها وأخبار سجني شائعات
رد الفنان محمد رمضان من جديد على أنباء الحكم عليه بالسجن لمدة سنتين، وأكد أنه سيتواصل بعد قليل مع مسئولي حفله في الولايات المتحدة الأمريكية يوم 17 يناير المقبل، من أجل التأكيد على إقامة حفله في موعده، خاصة بعد قلق المنظمين بسبب تداول أنباء حبسه.
وقال محمد رمضان خلال فيديو له عبر حسابه الرسمي على إنستجرام : "أنا عندي زووم ميتينج كمان شوية مع ماديسون سكوير جاردن ولايف نيشن أمريكا .. بيطمنوا عليا.. بيقولوا لي في أخبار واصلانا إنك عندك سنتين سجن .. وده ممكن يأثر على وجودك في حفلة 17 يناير في ماديسون سكوير جاردن .. فقولت لهم لا دي شائعات طبعً .. وأنا مع جمهوري ومعاكم يوم 17 يناير اللي جاي يعني في أقل من شهر .. واللينك في البايو عشان الناس تعرف تحجز".
وتابع : "فقالوا لي ليه الأخبار اللي من بلدك كلها سلبية؟ .. قولت لهم لأن بلدي بتحبني وعايزاني أحسن .. فخايفة إني أتغر .. بتحفزني يعني .. فطبعًا الكلام ده بيأثر على شغلي ومستقبلي وحفلاتي".
وأكمل محمد رمضان : "فثقة في الله هنعمل أقوى حفلة .. وثقة في الله هنثبت للعالم كله قوتنا كعرب في نيويورك في أشهر أرينا في العالم .. إن جمهورنا قد إيه وثقة في الله ووعد وهتشهد على ده الشرطة الأمريكية .. خاصةً شرطة نيويورك اللي هتنظم الحفلة وهتنظم الطرق ودخول الجمهور وتأمين الجمهور .. هيشهدوا على جمهورنا وعددنا وقوتنا وصوتنا عالي لحد فين ويقدر يوصل لحد فين .. وثقة في الله أقوى حفلة."
كما كتب رمضان عبر إنستجرام كذلك معُلقًا على الفيديو : "اعتذر لعائلتي و جمهوري و أصدقائي عن هذه الأخبار التي تتداولها المحاكم والصحافة المصرية من حوالي اكتر من 7 سنوات متصلة .. ومفيش شهر بيعدي من غير أحكام بالسجن لي ووصلت حتى لابني الطفل".
وواصل : "آخر قضية أغنية معايا تصريح الرقابة بعرضها ز. و كمان مش أنا أصلاً اللي كاتبها .. ومع ذلك أتحكم عليا بالسجن ولكن مع إيقاف التنفيذ .. ولم توضح الصحافة إنه مع إيقاف التنفيذ .. محاولة لوقوع ضرر بالفعل لي ولعائلتي".
واختتم محمد رمضان : "ملحوظة هفضل أحب بلدي وأعشق ترابها للأبد .. ثقة في الله نجاح متصاعد مستمر ".
