محمد أنور يدافع عن أحمد السقا وينتقد تريندات السوشيال ميديا
دافع الفنان محمد أنور عن النجم أحمد السقا، بعد تعرض الأخير للانتقادات والسخرية خلال الساعات القليلة الماضية، بسبب فيديو باللغة الإنجليزية تحدث خلاله عن دعمه لنجم الكرة المصرية اللاعب العالمي محمد صلاح، بعد أزمته الأخيرة مع مدربه آرني سلوت.
محمد أنور يدافع عن أحمد السقا
وشارك محمد أنور، عبر حسابه على إنستجرام، صورة جمعته بـ أحمد السقا، وكتب:" أحمد السقا فعلًا ميجا ستار.. فيه ناس بتقولها على نفسها معملوش ربع تاريخه.. ولا أعمالهم هتعيش وهتعلم زي أعماله.. كل أفلامه علامات في تاريخ السينما المصرية.. أحمد السقا أصبح أيقونة في الأكشن.. والناس في الشارع لما بتلاقي واحد قلبه جامد بتقوله أنت فاكر نفسك أحمد السقا ولا إيه".
محمد صلاح عمل تاريخ مشرف
وتابع:" ومحمد صلاح عمل تاريخ مشرف وأصبح ملهم.. وخلى المستحيل ممكن.. ووصل لمكانة أظن مفيش حد عربي هيوصلها تاني.. على الأقل طول ماحنا عايشين .. فبدل ما نفرح إننا حضرنا ده.. لا بنحاول نهده ونفرح فيه وبنتمنى وقوعه بسرعة.. وقبلهم مجدي يعقوب وعمرو دياب ومنى زكي .. وخوض في أعراض ومين طلق ومين إتجوز ومين مات وغيرهم كتير".
محمد أنور ينتقد بعض رواد السوشيال ميديا
وأكمل محمد أنور منتقدًا بعض رواد السوشيال ميديا : "السوشيال ميديا مفيدة أحياناً .. وفيها ناس محترمة كتير وكلامهم مهم وآراءهم محترمة .. حتى لو كان نقد سلبي لكنهم للأسف قلة .. أما الغالبية العظمى والأكثر تأثيرًا على السوشيال ميديا كلها تريندات هدم .. سواء في شخص أو مجتمع وشتايم وتريقة وإثارة فتن .. ودي بتأثر عالوعي الجمعي أكتر .. وأنا نفسي بتأثر بده حتى لو كنت أعرف الشخص ده وعارف إنه مايعملش كده لكني للأسف بصدق".
السوشيال ميديا أصبحت مرعبة
وأضاف : "السوشيال ميديا أصبحت مرعبة حقيقي .. وطلعت كل اللي في النفوس .. بقى سهل الواحد يطلع كل السواد اللي جواه في الحقيقة عالسوشيال ميديا من غير خوف .. ومحدش شايفه ولا هيحاسبه .. ومحدش بيحط نفسه مكان اللي بيشتمه ده إنه مهما كانت نجوميته أو مركزه وقيمته في المجتمع .. فهو في الآخر إنسان زيك".
وواصل أنور "لما يقرأ الكلام ده أو حد من أهله أو أولاده ممكن يحصله إيه ؟ .. وهينام اليوم ده عامل إزاي ؟ .. ومحدش بيديله فرصة يدافع عن نفسه .. يمكن يبقي مظلوم .. بس إزاي نسمع منه كده التريند هيبوظ".
المهم هو التريند
واختتم محمد أنور : "المهم هو التريند .. هنستلم مين النهارده ونهينه هو وأهله بسرعة مفيش وقت .. علشان بكرا فيه تريند جديد وضحية جديدة .. هينام بكره معيط هو كمان".
