عم لاعب طائرة الزمالك: الكلب قطع حتة من كتف مالك وأصحاب الفيلا هربوه

تعرض لاعب كرة طائرة بنادي الزمالك يدعي مالك أحمد، يبلغ من العمر 12 عاما، لهجوم من كلب شرس يعد من السلالات المحظور تربيتها داخل إحدى الفلل بمنطقة حدائق الأهرام.

هجوم كلب شرس على الطفل

وكشف محمد رشدي، عم الطفل مالك، في تصريحات لموقع "نيوز رووم" أن تفاصيل الواقعة تعود ليوم الخميس الماضي، بقوله: "كان مالك ابن أخويا، رايح ياخد درس مع زمايله في فيلا أحد أصدقائه في حدائق الأهرام، وأصحاب الفيلا عندهم كلب نوعه إيطالي من الأنواع المحظور تربيتها، والكلب لم يكن مربوط ولا مقفول عليه، ومتساب يمشي لوحده حوالين الفيلا من غير حتى ما يحطوا كمامة على فمه".

وأضاف: "بعد ما مالك خلص الدرس، كلم والدته عشان تيجي تاخده توصله نادي الزمالك لأنه كان عنده ماتش في النادي، وقالت له يستنى لحد لما تقرب وهتكلمه يطلع، ومالك كان لابس تيشيرت النادي تحت الجاكيت عشان الماتش، لكن وهو خارج من الفيلا فجأة الكلب هجم عليه، ومالك وقع على الأرض، والكلب مسكه من كتفه وفضل يجر فيه هو والشنطة بتاعته من جوه الفيلا لحد الشارع، واللي أنقذه عامل دليفري كان شايف اللي حصل، فدخل بالموتسيكل في الكلب عشان يسيبه".

وتابع: "حد من الجيران اتصل بوالدته وقال لها اللي حصل، وهي كلمت جار قريب منهم وراح قبلها وشاف الجرح من تحت هدوم مالك، لكنه رفض يخلي والدته تشوفه عشان ما تنهارش، لأن منظر الجرح كان صعب جدا، وبعدها واحدة من أصحاب الفيلا خرجت ووقفت مع مالك، وفي واحد من جيران أخويا أخد مالك على مستشفى زايد عشان ياخد المصل ويفحصوا الجرح".

وكشف عم الطفل أنهم: "أول ما وصلوا المستشفى وقلعوا الولد التيشيرت، مالك انهار من منظر الجرح، وأنا كنت بعيد عنهم، ولما كلمت أبو مالك لقيته منهار وبيقول لي إن في حتة من كتف مالك مش موجودة".

واستكمل عم مالك: "في مستشفى زايد تم تنظيف الجرح وإغلاقه بـ3غرز، وأخذ مالك الجرعة الأولى من مصل السعار، ثم تم تحويله بعد ذلك إلى مستشفى أكتوبر العام لتلقي حقنة الأجسام المضادة".

وأكد أن "الجيران قبل كده كانوا متضررين من وجود الكلب ده واشتكوا منه أكثر من مرة، وإحنا كمان قدمنا بلاغ رسمي بالواقعة ورحنا بمالك مستشفى الهرم عشان يعملوا تقرير طبي بالإصابات"، وأضاف أنه علم لاحقا أن أصحاب الفيلا هربوا الكلب من المكان بعد اللي حصل.