ياسين منصور: الأهلي أقوى براند في الشرق الأوسط.. وحب المصريين له بدون مقابل

أكد رجل الأعمال ياسين منصور، نائب رئيس مجلس إدارة النادي الأهلي، أن النادي الأحمر يمثل حبًا بلا مقابل للملايين داخل مصر وخارجها، مشيرًا إلى أن "براند" الأهلي هو الأقوى في الشرق الأوسط وإفريقيا على الإطلاق.

 وقال نائب رئيس مجلس إدارة النادي الأهلي خلال لقائه ببرنامج "بزنس مع لبنى" على قناة “سكاي نيوز”: "الأهلي عالمي طبعًا، الأهلي أكبر نادي في العالم.. هو الأهلي كبير طول عمره، كبير بكل من يتعامل فيه.. هي حب بلا مقابل".

حب النادي الأهلي

ربط منصور بين تاريخ النادي وتفاني القيادات المتعاقبة في خدمته، قائلًا: "سواء من أول أنا كنت زمان مع الكابتن صالح السليم الله يرحمه في مجلس الإدارة، وبعدين الكابتن حسن حمدي ربنا يديله الصحة، وبعدين دلوقتي مع الخطيب، فالحقيقة كلهم الناس فيه تفانٍ تام في حب نادي الأهلي".

وأضاف نائب رئيس مجلس الإدارة: "هو الحاجة اللي تسعد المصريين.. أنا بلاقي إن الواحد ربنا حطه في حتة إن هو عنده حتى حاجة صغيرة ممكن يعملها تسعد سبعين تمانين مليون وبره برده... وبره برده كتير بيقدر".

الاستثمار في الناشئين والجماهير

وحول رؤيته لتطوير النادي، حدد منصور محورين رئيسيين، أولهما الاهتمام بالناشئين، قائلًا: "مصر فيها 110 مليون، أكيد أكيد يعني فيهم 20-30 محمد صلاح، عايزة بس العين اللي تعرف تستثمر فيه... دي أنا بركز فيها مع كابتن خطيب يعني، ومع كابتن سيد عبد الحفيظ اللي هو معنا في المجلس ومسؤول عن نشاط الكرة، ودي حاجة أنا شايفها مهمة جدًا".

أما المحور الثاني فهو زيادة دخل النادي، حيث أوضح: "الحاجة التانية هي إزاي نتعاون مع الدولة إن إحنا نزود دخول النادي الأهلي.. النادي الأهلي نجح في الرعاة جاي بيجيب أرقام كويسة جدًا، أعلى من أي حد في مصر بمراحل، لأنه هو براند.. براند الأهلي ده هو أقوى براند في الشرق الأوسط بكامل وفي أفريقيا، يعني مافيش براند تاني ممكن ينافس".

مقارنة بالدوريات الأوروبية وتجربة الجماهير

ولفت منصور إلى الفجوة بين واقع النادي وإمكانياته، مشيرًا إلى أن: "الأرقام اللي بتخش النهاردة دي ممكن يجيب عشر أو عشرين ضعف لها.. لكن المشكلة إنه  في أوروبا مثلاً التذاكر بتمثل حوالي من 25-30% من الدخل بتاعها، إحنا في مصر هو لا يتعدى 1%".

وعزا ذلك إلى تحديات تجربة الجمهور في الملاعب المصرية، قائلًا: "ليه؟ لأن التجربة نفسها.. لازم تروحي الاستاد يطلع أربع ساعات بدري، تقضي في الحر وكده.. فلازم مع الدولة ومع الجهات الأمنية يعني إنه بقى فيه اتفاق، زي الناس تروح قبل المباراة بخمس دقائق يخش يلاقي كرسي برقم يقعد عليه محدش ياخده، حاجات زي كده بتالي دي هتفرق جامد قوي في دخل النادي الأهلي".