مكالمة تليفون على ماسنجر.. محمد سيد بشير يكشف كواليس مسلسل الأميرة

كشف المؤلف محمد سيد بشير مفاجآت عن كواليس مسلسل "الأميرة" التي لعبت بطولته الفنانة ياسمين صبري، مشيرًا إلى أن الأقدار لعبت دورًا هامًا في تلك المرحلة من حياته، حيث اتفق على تنفيذ المسلسل ومشاركته في الموسم الرمضاني 2024 قبل التصوير بأسبوع واحد فقط.

كواليس الاتفاق على مسلسل الأميرة 

وقال المؤلف محمد سيد بشير خلال لقائه مع الفنانة هبة عبد الغني في بودكاست "بوب كورنر": خطة ربنا ديمًا بيتكون جميلة، أنا مضيت مسلسل الأميرة في 2021 مع المنتج حسام شوقي اللي بعتبره أبويا ولحم كتافي من خيره ويارب ينول أعلى درجات الجنة، وبعدين حصل توقف 2022 و2023."

وأردف محمد سيد بشير: "وقبل رمضان 2024 بأيام نزلت عملت حاجة لله، وأول ما حطيت المفتاح في الباب وقبل ما أدخل البيت جالي تليفون على ماسنجر من حد مش معاه رقمي، ولما رديت لقيت واحد بيسألني عن مسلسل "الأميرة" فقولتله إنه كان مع الراحل حسام شوقي، فقالي "عندك مشكلة يتعمل مع المنتجة مها سليم وبطلته ياسمين صبري؟"، وبلغني إن كلهم قرأوا، وبعد أسبوع بالظبط بدأنا تصويره."

وأضاف محمد سيد بشير: “المسلسل نجح بطريقة مش طبيعية، وناس كتير استغربت إن اللي كاتبه راجل، بس ديمًا رهان الستات معايا كسبان، ويوم 5 رمضان لقيت كل جروبات الستات بتتكلم عن المسلسل وإن ديه قصتهم، ديه مش شطارة ولكن نتيجة مذاكرة، اتعلمت أنماط الشخصيات بسبب المسلسل، وعشان كده الحمد لله أغلب دكاترة النفسية كانوا بيشيدوا بالمسلسل والتغيرات اللي بتحصلهم، وده فادني في المشاريع الجديدة.”

رسالة للمؤلفين الجُدد

وحرص محمد سيد بشير على توجيه رسالة للمؤلفين الجُدد، قائلًا: “كنت في الأول بكتب الشخصيات ديه من مخزون خبرة لكن دلوقتي بعد الدراسة التفكير مختلف، عشان كده بنصح الناس تقرأ عن أنماط الشخصيات، هيفيدهم في حياتهم بطرق مختلفة.”

أبطال مسلسل الأميرة ضل حيطة

ويعد مسلسل الأميرة ضل حيطة من بطولة ياسمين صبري، نيقولا معوض، وفاء عامر، مها نصار، هالة فاخر، هند عبد الحليم، عابد عناني، هاجر عفيفي، سمر مرسي، وعزت زين، وعدد من الفنانين الآخرين، ومن تأليف محمد سيد بشير، ومن إخراج شيرين عادل.