محمد عبد الرحمن توتا: الكوميديا فيها 80 % من التنمر !
قال الفنان الكوميدي محمد عبد الرحمن توتا، إن الكوميديا فيها شئ من التنمر بنسبة 80%، مضيفا: «دخلت في تانية ثاني علمي علوم وأخدت أحياء بدل الكيمياء وصعبتها على نفسي أكتر وكنت طالب متفوق ودحيح».
وأوضح، خلال لقائه ببرنامج «الستات»، المذاع على قناة «النهار»: «في ثانوي بعد المذاكرة والإرهاق والسهر جبت 85%، يعني لو كان في معهد لكلية طب كنت دخلته، لكن كلية طب نفسها مستحيل أدخلها بالمجموع دا».
أحلام الطفولة
في سياق متصل، تحدث الفنان الكوميدي محمد عبد الرحمن «توتا» عن أحلامه خلال فترة الطفولة، قائلا إنه كان يحلم أن يعمل طيارا، لكن خلال أحلام فترة الثانوية تمنى أن يكون صيدلي، معلقا: «الإعلانات جتلي وأنا صغير جدا كان عندي 7 سنوات كنت بجيب فينو لأمي وواحد بصلي كده وقالي مش عايز تعمل إعلانات؟ قولتله اه عادي».
من فينو إلى الإعلان
وأضاف، خلال لقائه ببرنامج «الستات»، المذاع على قناة «النهار»: «بعدها روحت لماما البيت وقولتلها اللي حصل قالتلي بص يا محمد احنا مش بتوع الحاجات دي خالص، وذاكر وشهادتك وبتاع ومفيش الكلام دا، فطبعا الموضوع نور لمية جوايا وأنا كمان كنت بحب الإعلانات أوي، كمان الإعلانات زمان كانت حلوة والأغاني كانت حلوة غير دلوقتي».
توتا: ركبت الطيارة هتاخدك وتقع
وتابع: «فترة التسعينيات كانت مجد الإعلانات، لكن أخذت بكلامي ماما، وفي نفس الفترة كنت بحلم أكون طيار لدرجة إن قرايبنا بيقولولي يا كابتن، وفجأة بتكلم مع صحابي في المدرسة بقولهم إن شاء الله هبقى طيار كنت مليان أكتر من كده فقالولي ازاي انت لو ركبت الطيارة هتاخدك وتقع».
في وقت سابق، أعرب الفنان محمد عبد الرحمن الشهير بتوتا بسعادته الشديدة عن انتهاء حرب غزة، مشيرا إلى أنه كان قد اتخذ عهدا على نفسه بأن لا يغير صورة علم غزة على حساباته الشخصية إلا بانتهاء الحرب.
وكتب محمد عبد الرحمن عبر حسابه بموقع إنستجرام: «ديه صورة البروفايل عندي من سنتين من يوم 10 أكتوبر بالظبط علي ما أذكر وكنت واخد عهد ما أغيرهاش إلا أما ربنا يفك الأزمة ويزيح الغمة والحمد لله حصل جاي بغيرها دلوقتي مش راضية تتغير شكلها هتفضل معايا بقى بقت عشرة».
