صابرين جابر تكشف لـ"نيوز رووم" مين يستحق البونبوني
في وصف دقيق ومميز عبر خبيرة العلاقات الأسرية صابرين جابر أن المشاعر مثل البونبوني نشاركها مع من نحب، وفي تصريحات خاصة لموقع "نيوز رووم" تساءلت صابرين جابر: مين يستحق البونبوني؟!
وأجابت: "مشاعرنا أحيانا عاملة زي البونبوني.. بنفضل نديها لحد ما الكيس يفضي.. بنحب ونهتم ونفتح قلبنا، ونحس إننا لو ما شاركناش حد إحساسنا الحلو الحياة مش هتمشي.
وبعدين فجأة نلاقي نفسنا ضيعنا مشاعرنا على ناس مش بتستحقها الناس اللي مش مقدرة مش شايفة قيمتها".
وأشارت إلى أن "الوجع مش بس في الخسارة، لكن كمان في الإدراك المتأخر: إن إحساسنا كله راح في مكان غلط".
وأضافت "اللي أصعب من ده إن لما الشخص الصح يظهر نلاقي نفسنا فضينا من جوه كل الحب والطاقة اللي كنا بنديها قبل كده راحت وإحنا محتاجين نرجع نبني نفسنا ونفتح قلبنا من جديد".
ولفتت إلى أن “مشكلتنا مش دايمًا فينا ساعات بنصدق إن أي حد يستاهل إحساسنا نفتح قلبنا بسرعة ونظن إن الحب والاهتمام هيخلي الشخص يبادلك نفس المشاعر الحقيقة.. مش كل الناس عندها القدرة على التقدير أو الامتنان”.
وأوضحت أن "اللي بيخدعنا أحيانا إن الشخص الغلط ممكن يكون لطيف وكلامه حلو لكن لما نقرب نكتشف إنه مش مستعد يحط قلبه جنب قلبنا.. إحنا بندي وبندي وهو بياخد ومش بيرجع".
ونصحت بأنه "مهما حصل مش لازم نلوم نفسنا على المشاعر اللي قدمناها.. كل تجربة علمتنا كل حب ضاع علمنا نميز مين يستحق قلبنا ومين لأ، وأهم حاجة لما نتعلم نوجه مشاعرنا للناس الصح".
واختتمت بقولها: "في النهاية
- اختاري مين يستحق قلبك بعناية: مش كل حد يستاهل اهتمامك ركزي على الناس اللي بتبادلك نفس الإحساس.
- انتظري قبل ما تفتحي قلبك: خدي وقتك تعرفي الشخص كويس قبل ما تدخليه حياتك بالكامل.
- راقبي الأفعال مش الكلام: اللي بيهتم فعلا ويقدر قيمتك هو اللي يظهر ده بأفعاله مش كلامه بس.
- اتعلمي من كل تجربة: كل مرة بندي فيها مشاعرنا للغلط هي فرصة نفهم نفسنا أكتر ونعرف مين الصح اللي يستاهل البونبوني الحقيقي.
- خدي وقتك تملئي قلبك قبل أي علاقة جديدة: قبل ما الشخص الصح يظهر اتأكدي إنك راضية عن نفسك وجاهزة تدي الحب من غير خوف".
