علاقتنا بنفسنا هي الأصعب.. أسما شريف منير تثير الجدل بمنشور جديد
أثارت الإعلامية أسما شريف منير الجدل من جديد، بمنشور لها تتحدث من خلاله عن علاقة كل شخص بنفسه، وأنها تعد العلاقة الأصعب، وذلك عبر حسابها الرسمي على موقع تبادل الصور والفيديوهات إنستجرام.
أسما شريف منير تثير الجدل بمنشور
وقالت أسما شريف منير في هذا المنشور: " فيه لحظة إحنا كلّنا مرّينا بيها، اللحظة اللي بنبص فيها لوشّنا ونحس إننا مش شايفين شكلنا، شايفين حاجات مستخبية: تعب، خوف، كلام متكتم، ووجع محدش يعرفه غير ربنا، فيه ناس بتقوم من النوم وتحس إنهم لابسين “وشّهم” عادي، بس جوّاهم في دوشة محدش سامعها، يغلطوا في نفسهم، يلوموها، يخفوا ضعفهم، ويفضل السؤال جوّاهم يزنّ: “ليه أنا مش قادر أرتاح مع نفسي؟”، الحقيقة؟ علاقتنا بنفسنا هي أصعب علاقة في الدنيا، أعقد من أي حب، وأعمق من أي صداقة، بنقرب، وبنبعد، بنخاف، وبنتشجّع، وبنرجع نقول: “طب هو أنا مين أصلاً؟”، كتير قوي منكم حاسين إنهم تايهين، مش عشان وحشين، ولا ضعاف، لكن عشان عمرهم ما وقفوا دقيقة وقالوا لنفسهم: “تعالي نتعرف… من أول وجديد.”
أسما شريف منير توجه رسالة إلي جمهورها
واستكملت أسما شريف حديثها قائلة: "ربنا قال: قد أفلح من زكّاها، معنى الآية دي إنك لو فهمت نفسك، لو طيّبت على روحك، لو سمعت اللي جواك هتفلح، هتهدى، هتقوم على رجليك تاني، وفيه ناس منكم عاملين نفس الخطوة دي من غير ما ياخدوا بالهم، بيكتبوا شوية كلام على ورق، بيعيطوا لوحدهم، بيحاولوا يفكّوا عقدة كانوا فاكرينها مستحيلة، واللي ما يعرفوش إن دي أول خطوة، وأنها أصعب خطوة، وإنها خطوة “بداية الرحلة”.
رأي أسما شريف منير في فيلم دخل الربيع يضحك
في سياق منفصل، قد أعربت الإعلامية أسما شريف منير عن سعادتها بعدما حضرت فيلم دخل الربيع يضحك، وذلك من خلال منشورًا عبر حسابها الرسمي على موقع تبادل الصور والفيديوهات إنستجرام.
وقالت أسما شريف منير في منشورها: “ أنا بعشق الربيع، أنا مولوده في شهر أربعة و بحس ده اللي بيخليني شخص متفائل، بحب البني آدمين بكل تعقيدهم، بكل تناقضهم، وباللي بيخفّوه أكتر من اللي بيظهروا، فيلم دخل الربيع يضحك لمسني جدًا… يمكن عشان هو عنّـا كلنا، عن البدايات اللي بتحسها مزهرة، بس عمرها ما بتكمل زي ما بدأِت، أربع حكايات مختلفة، كل واحدة فيهم بتنتهي نهاية موجعة… مش درامية، لأ، حقيقية، الممثلين في الفيلم مش محترفين، وده يمكن أكتر حاجة خلّت كل لقطة صادقة أوي، وجُمل بسيطة بس موجعة، عشان طالعة من ناس عايشينها مش بيأدوها.”
