عن مباراة القمة.. عمرو أديب: "لو الزمالك كسب بكرة هجيلكم بجلابية بيضا"
قال الإعلامي عمرو أديب: أنا آديلي 7 سنين شغال ف الاستوديو ده، محدش جه في يوم وقالي عايز اتصور معاك، اللي بيكلم مراته بخصوص العشا، واللي واللي، النهاردة لقيت الناس بتقول لي عايزين نتصور معاك، ليه يا جماعة؟ علشان الجلابية.
“بكرة لو الزمالك فاز هلبس جلابية بيضا”
وأضاف، خلال تقديمه برنامج الحكاية، والمذاع عبر قناة إم بي سي مصر، :"بكرة لو الزمالك فاز هلبس جلابية بيضا، كل يوم نلبس حاجة جديدة، من ثقافة بلدنا".
واستطرد:"أنا بطالب يبقى في جلابية بارتي، نروح كلنا في مكان ما، ونلبس الجلاليب، إنت شايف حاجة عظمة، عادة وفخر وألاجة ومن جوة طراوة، أنا أعيش في جلباب أبي».
وتابع:" قلت لهم لما دخلت الاستوديو اللي هيضحك، هضربه بالعصاية دي، هذه ثقافتي، ومن حقي أن استمتع بها بطريقتي، إحنا بتوع الهاند ميد، هو شغل مكن، شايف النعومة والجمال".
“أنا اتبهدلت بنطلونات 30 سنة”
وأضاف، خلال تقديمه برنامج “الحكاية” المذاع عبر قناة إم بي سي مصر:"أنا اتبهدلت بنطلونات 30 سنة، النهاردة أنا أشعر بالحرية، أنا حابب اقول مين مصر، هي لحظة ثقافة، لمحة إبداع، شايف الجمال شايف الحلاوة، وحاسس ان الجلابية دي وشها هيكون حلو على الزمالك، هيأثر بكره على ناصر منسي، وعلى كل اللاعبين.
وتابع: "هشام شرقاوي إللي عامل الجلابية دي مرضيش يأخد مني فلوس، أنا فخور إني لبس الجلابية دي وكمان فيها رحرحة.
الجلابية منتشرة في مصر
وظهر الإعلامي عمرو أديب، في بداية حلقة برنامج “الحكاية” بالجلابية البلدي، مضيفًا:"أنتوا تعلموا التريند اليومين اللي فاتوا، الجلابية منتشرة في مصر، انزل إلى الصعيد وهتشوف الجلاليب، أن فخور بلبسي، الجلابية دي فرعوني، بجد أنا مستمتع أنا سعيد".
وفي وقت سابق، علق الإعلامي عمرو أديب على الانتقادات التي وجهها البعض للجلابية الصعيدي، مؤكدًا أن الجلابية رمز للراحة والرضا، مشيرًا إلى أنه إذا خُيّر أي شخص، فسيختار ارتداء الجلابية دون تردد لما تمنحه من بساطة وراحة.
وجاء ذلك في تغريدة له على صفحته الرسمية بمنصة "إكس" قائلًا: لو خيرتنى ولو حررتنى ولو ضمنتلى جزء من الرضا الاجتماعى طبعا البس الجلابيه البلدى باللاسه الحرير والطاقيه الصوف الانجليزي بتاع مانشستر ، قمه الراحه والالاجه
حالة من الجدل شهدتها مواقع التواصل الاجتماعي بعد تعليق سمر فودة
وانتشر حالة من الجدل شهدتها مواقع التواصل الاجتماعي خلال الايام الماضية، بعدما علّقت الإعلامية سمر فودة، ابنة المفكر الراحل فرج فودة، على صورة الحاج رشاد وزوجته في أثناء زيارتهما للمتحف المصري الكبير، مرتديين الزي الصعيدي الأصيل.
المشهد لاقى إعجاب المصريين واعتبروه تجسيدًا للأصالة والبساطة المصرية، قبل أن تفجّر فودة موجة غضب واسعة بهجومها على ملابسهما.
