الأطباء قالولها بتدلعي.. إصابة ابنة شريف عواد بنزيف في المخ ومكوثها بالعناية

كشفت زوجة الفنان شريف عواد عن تعرض ابنتهما لأزمة صحية، حيث تبين إصابتها بنزيف في المخ، منزعجة من إهمال الأطباء الذين لم يشخصوا حالتها من البداية وظنوا أنها تتوهم المرض.

 قالولها روحي نامي

وكتبت زوجة الفنان شريف عواد عبر حسابها بموقع فيسبوك :"شروق شريف عواد ابنتي وابنة الفنان شريف عواد كانت يوم الجمعة اللي فاتت اللي هوه اليوم اللي قبل افتتاح المتحف والتنقلات داخل الجيزة صعبة كنا كعيلة قاعدين نفكر هنتغدى إيه وفجأة لقيتها بتصرخ أنا حاسه بصداع وعيني مش شايفة بيها كل الحاجات اللى حواليه بعيدة، أبوها نزل وخدها بسرعة على أقرب مستشفى لينا في الهرم قاسوا ضغطها لقوه واطي علقولها محاليل وسألوها انتى متضايقة من حاجة؟ حد مزعلك ؟ ولما قالتلهم لأ خلصت المحاليل والوضع متحسنش قالولها روحي نامي".

اكتشفوا إن عندها نزيف في المخ وإنها مش بتدلع

وأضافت بهية زوجة شريف عواد: “أبوها قلق خدها وداها طوارئ في مستشفى في العجوزة سألوها نفس الأسئلة ولما قالتلهم لأ قالولها انتي بتدلعي روحي نامي من غير ما حتى يقيسولها الضغط، واحنا تقريبا صدقنا وخدناها تنام صحيت الصبح تاني يوم فى حالة أسوء الصداع مخلصش وحركتها بقت صعبة ومش مدركة للمسافات أبوها خدها وداها مستشفى ثالثة أصر يعملها رسم مخ فعملولها أشعة مقطعية على المخ واكتشفوا إن عندها نزيف في المخ وإنها مش بتدلع وحاجزينها بقالهم أسبوع فى العناية المركزة لمحاصرة النزيف”..

وأكملت: “المحزن إن الدكاترة بيتعاملوا مع الشباب فى السن ده إنهم بيتدلعوا واحنا كأهل لو كنا فضلنا مصدقين الدكاترة وممشيناش ورا خوفنا على ولادنا الله أعلم كان هيجرا إيه أسوأ من كده، أنا قلقانه على بنتى أوى وهي خايفة عليا إني مش ماشية فى مشوار علاجي من السرطان وأنا مش شايفة أي أهمية لحياتى إلا عشان شروق ، هي دايرة مش عارفة هتخلص امتى ربنا وحده اللي هيحلها”.