إسماعيل فرغلي: بفك كرب الغارمين وبعلم الناس عربي.. وده صدقة جارية لمراتي

تحدث الفنان إسماعيل فرغلي عن مبادراته الإنسانية المتعددة، قائلا: «الغارمين والغارمات عرفت إن الزكاة تجوز عليهم، والراجل أو الست اللي محبوسين دول ممكن أطلع منهم من 1000 لـ5000 غارم، بس الأهم إني أسمع قصتهم وأفهم وجعهم».

برنامج قول يارب للفنان إسماعيل فرغلي

وأضاف فرغلي خلال لقائه في بودكاست «إنذار مع نزار» الذي يقدمه الدكتور نزار السيسي عبر «نيوز رووم»: «كنت بعمل برنامج اسمه قول يارب، واستضيف الناس دي وأعرف حكايتهم، وأوقات كتير بيكون واخد براءة ومش عارف، ولما أقول له قول يارب وأخده يشوف مراته وعياله، يعرف ساعتها إنه حر.. اللحظة دي بتسوى الدنيا كلها».

وكشف الفنان عن مبادرة جديدة يتبناها، قائلا: «عملت مبادرة لتعليم اللغة العربية في مدارس الإنترناشونال، وده امتداد لفكرة محو الأمية، لأننا بنتكلم بلغة القرآن ومش حاسين بالنعمة دي».

مبادرة تعليم اللغة العربية للمدارس الدولية

وأضاف: «أنا مش ضد إن أولادي يتعلموا لغات تانية، بس لازم الأساس هو العربي، عشان يعرفوا يقروا القرآن أو الإنجيل، واعتبرت المبادرة دي صدقة جارية على روح مراتي، إن كل حرف بيتقري تاخد عليه ثواب، وكل الأفكار دي بتيجي بعد صلاة الفجر، وقت السكينة، لما القلب يكون رايق ومتصالح مع ربنا».

وفي سياق متصل، تحدث الفنان إسماعيل فرغلي عن العلاقة المميزة التي جمعته بزوجته الراحلة، مؤكدًا أنها كانت السبب الحقيقي وراء نجاحه واستقراره، قائلا: «مراتي رحمها الله كانت حياتي مش شريكتي بس، دي ست من اللي عايزة تعيش، متصالحة مع نفسها، وعلاقتها بربنا طيبة جدا، وكانت دايما سندي في كل حاجة».

علاقة الفنان إسماعيل فرغلي بزوجته

وأضاف فرغلي خلال لقائه في بودكاست «إنذار مع نزار» الذي يقدمه الدكتور نزار السيسي عبر «نيوز رووم»، أنها عاشت معاه أصعب الأيام، وكانت دائما تقف معه وتتحمل الأوقات العصيبة التي عاشوها سويا، مضيفًا: «أنا كنت بوطي على رجلها أبوسها، وأقولها أنا ببوس الرجل اللي شالتني 27 سنة، وهي اللي تستاهل كل كلمة حلوة، لأن اللي عملته معايا عمره ما يتعوض وإني أبوس رجليها ده قليل على اللي عملته معايا».