إسماعيل فرغلي: بدأت من شقة فيها 13 فرد.. ومبادرتي واجب إنساني
تحدث الفنان إسماعيل فرغلي عن بداياته البسيطة قائلا: «إحنا كنا في الشقة 13 واحد، ووالدي كان موظف على قد حاله، لكن البركة كانت مالية البيت، لأن المال كان حلال.. كنا عايشين برضا، وربنا كان دايما ساترها».
الفنان إسماعيل فرغلي صاحب مبادرة دعم الصم وضعاف السمع
وأضاف فرغلي خلال لقائه في بودكاست «إنذار مع نزار» الذي يقدمه الدكتور نزار السيسي عبر «نيوز رووم»، أنه مؤمن بأن «الخير مش محتاج إمكانيات، محتاج نية صافية»، موضحًا أنه صاحب مبادرة دعم الصم وضعاف السمع والغارمات، قائلا: «ربنا بيسبب الأسباب، وصديقي المخرج المسرحي محمد علام كان بيعمل أول مسرحية للصم في مصر اسمها العطر، وقالي تعالى سلم عليهم، ومن وقتها حسيت إن دول محتاجين اللي يسمعهم».
وأشار الفنان إلى أن اهتمامه بالعمل الخيري نابع من تربيته، قائلا: «أمي الله يرحمها زرعت فينا حب الخير وجبر الخواطر، وأنا مؤمن إننا مش هناخد معانا غير العمل الصالح».
تطبيق واصل يعكس دعم الدولة لأصحاب الهمم
وأشاد بدعم الدولة لأصحاب الهمم قائلا: «الرئيس السيسي بيهتم بيهم جدا بأصحاب الهمم وعمل تطبيق "واصل" للصم عشان يطلبوا النجدة أو الإسعاف أو المطافي، وأنا بدأت أتعلم لغة الإشارة، وعملت مؤتمر في نقابة المهن التمثيلية بحضور الدكتور أشرف زكي وأحمد بدير وأحمد سلامة، والحمد لله المبادرة كبرت وبقت صوت ناس كتير محدش كان سامعهم».
وفي سياق متصل، تحدث الفنان إسماعيل فرغلي عن العلاقة المميزة التي جمعته بزوجته الراحلة، مؤكدًا أنها كانت السبب الحقيقي وراء نجاحه واستقراره، قائلا: «مراتي رحمها الله كانت حياتي مش شريكتي بس، دي ست من اللي عايزة تعيش، متصالحة مع نفسها، وعلاقتها بربنا طيبة جدا، وكانت دايما سندي في كل حاجة».
علاقة الفنان إسماعيل فرغلي بزوجته
وأضاف فرغلي خلال لقائه في بودكاست «إنذار مع نزار» الذي يقدمه الدكتور نزار السيسي عبر «نيوز رووم»، أنها عاشت معاه أصعب الأيام، وكانت دائما تقف معه وتتحمل الأوقات العصيبة التي عاشوها سويا، مضيفًا: «أنا كنت بوطي على رجلها أبوسها، وأقولها أنا ببوس الرجل اللي شالتني 27 سنة، وهي اللي تستاهل كل كلمة حلوة، لأن اللي عملته معايا عمره ما يتعوض وإني أبوس رجليها ده قليل على اللي عملته معايا».
