مسلم يهاجم نقابة الموسيقيين ومصطفى كامل: اللي معاه واسطة بيدوس على أي حد
هاجم مطرب المهرجانات مسلم، نقابة المهن الموسيقية، والفنان مصطفى كامل نقيبها، وذلك بيبب إيقافه عن العمل ومنعه من الغناء لمدة عام.
وكتب مسلم عبر حسابه بموقع فيسبوك: هما عادي يسيبوا حد يبوس واحدة على المسرح، وبعد كده يفرشوا الأرض ورد ليه ويستقبلوه أحلى استقبال، وعادي يسيبوا حد يقول إيحاءات في الأغاني، وعادي برضه محدش يتكلم وعادي يسيبوا حد يقول كلام في أغاني يخلي العيال الصغيرة تعور بعضها، وكل ده ما يتحليبوش، وأنا اللي أفضل قاعد من غير شغل.
مسلم: نقابة الموسيقيين غير عادلة
وأضاف مسلم: بس الواحد لما يكون معاه سلطة بيدوس على أي حد ويطلع يتكلم باسم الفضيلة وانه راجل عادل وعمره ما ظلم، حسبي الله ونعم الوكيل، نقابة غير عادلة.
وكان مسلم قد أعلن أمس أنه سيسافر خارج مصر، بسبب أزمة منعه من العمل، حيث قال خلال فيديو على صفحته بموقع فيس بوك: قررت امشي من البلد وهبيع كل حاجة في الشقة وهتكل على الله لأني مش عارف أمارس شغلي، ولأني مش عارف اشتغل في بلدي، وهبدأ من بكره أشوف حد يشتري حاجتي، ومش عاوز أي حاجة تاني، أنا اتعرضت لظلم كبير من منتج ومن ناس ومن أهل ومن نقابة، وبقالي سنة مش عارف أصرف على بيتي وناس معايا في الفرقة فيهم اللي بيغسل كلى وأنا مش قادر أساعدهم ومفيش حاجة في ايدي اعملها وفلوسي قربت تخلص وكسرة الرجال صعبة.
وتابع مسلم: مفيش أمل والعيب مش في المحكمة ولا في بلدي العيب في الناس اللي بتقدر تمشي كل حاجة بدماغها وبالواسطة وترشي الناس، فانا قررت أمارس مهنتي بره طالما مش قادر أحقق حلمي في بلدي، واللي كان بيتمنى اني أتدمر انبسط أنا اتدمرت بما فيه الكفاية، وأنا كده كده كنت عارف اني هتحارب لحد آخر يوم في عمري، وفي ناس أقوى من أي حد بيدوسوا على غيرهم، ويقعدوهم في بيوتهم ويجيبولهم أمراض.
وكان مصطفى كامل قد طلب من مسلم أن يحل مشكلاته مع الشركات المتنازع معها حتى يستطيع أن يعود لعمله.
