مسلم يعلن سفره للخارج بعد أزمة إيقافه: هبيع كل حاجة وهسيب البلد
أعلن مسلم اعتزامه السفر خارج مصر، وبيع ممتلكاته، وذلك على خلفيه منعه من الغناء وأزمته مع نقابة المهن الموسيقيين، والتي أوقفته في مارس الماضي بسبب شكاوى من شركات قد تعاقد معها ومتعهدي حفلات لعدم التزامه.
وقال مسلم خلال فيديو على صفحته بموقع فيس بوك: خلاص قررت امشي من البلد هسافر وأسيب البلد وأبيع كل حاجة في الشقة وهصفي كل حاجة وهتكل على الله لأني مش عارف أمارس شغلي، ولأني مش عارف اشتغل في بلدي.
https://www.instagram.com/reel/DQptzUUDD_1/?igsh=YzIwMGZucmtpbHho
اتعرضت لظلم كبير
وأضاف مسلم: هبدأ من بكره أشوف حد يشتري حاجتي، ومش عاوز أي حاجة تاني، أنا اتعرضت لظلم كبير وظلمت بما فيه الكفاية من منتج ومن ومن ناس ومن أهل ومن نقابة، وبقالي سنة مش عارف أصرف على بيتي وناس معايا في الفرقة فيهم اللي بيغسل كلى وأنا مش قادر أساعدهم ومفيش حاجة في ايدي اعملها وفلوسي قربت تخلص وكسرة الرجال صعبة.
وتابع مسلم: هسافر مدام مفيش أمل مع ان المحكمة حاكمة لي إني اشتغل وفسخت العقد مع الشركة اللي كان معايا فيها مشاكل، والعيب مش في المحكمة ولا في بلدي العيب في الناس اللي بتقدر تمشي كل حاجة بدماغها وبالواسطة وترشي الناس، فانا قررت أمارس مهنتي بره طالما مش قادر أحقق حلمي في بلدي.
أنا اتدمرت بما يكفي
وأكل مطرب المهرجانات: اللي كان بيتمنى اني أتدمر انبسط أنا اتدمرت بما فيه الكفاية، ومش بعمل كده علشان صوتي يوصل لحد أو أن حد يشوف الفيديو ويتأثر ويتقال شغلوه، أنا كده كده كنت عارف اني هتحارب لحد آخر يوم في عمري، وفي ناس أقوى من أي حد بيدوسوا على غيرهم، ويقعدوهم في بيوتهم ويجيبولهم أمراض.
واختتم مسلم حديثه قائلا: اتمنى تفضلوا في ضهري وتدعموني لأني كويس ومش بتاع حورات ولا بتاع مشاكل أنا حلمي كله إني اشتغل، ويكفي اني قدرت أواجه مصطفى كامل وأظهر إني على حق لكن اللي في دماغه في دماغه وعرفت خلاص اني صعب أرجع النقابة لأني زعلت حد كبير جواها وعملت حورات.
وجاء ذلك بعد مداخلة هاتفية جمعته بنقيب الموسقييين مصطفى كامل في برنامج كلمة أخيرة مع الإعلامي أحمد سالم، حيث أكد النقيب أن مسلم لديه مشاكل مع شركات تعاقد معها ولم يلتزم بالعقود.
