بطلي تبقي سوبر وومان.. هيدي كرم توجه نصيحة للسيدات
ظهرت الفنانة هيدي كرم في مقطع فيديو جديد لها، وذلك عبر حسابها الرسمي على موقع تبادل الصور والفيديوهات "إنستجرام"، لتوجه رسالة إلي السيدات.
وبدأت هيدي كرم الفيديو قائلة: “أما تقعي في مشكلة، أو تقعي في أزمة، أو تبقي ضعيفة، أو تحسي أنك محتاجة حد تتسندي عليه، ومتلاقيش حد حواليكي إذا فجأة كله اتبخر، متلوميش غير نفسك، ليه، لأن أنتِ لما جيتي تلعبي دور الست القوية، وعملتي 7 رجالة في بعض، ولعبتي دور أنك تقدري تعملي كل حاجة وتخلصي كل حاجة، وهي مبتحتاجش حد يقف جنبها لأنها الست الفظيعة اللي محصلتش، فلما تقعي أعرفي أن أنتي اللي عودتي الناس أنك تقدري تهندلي كل حاجة”.
هيدي كرم تنصح السيدات
واستكملت هيدي كرم حديثها قائلة: “حتى جوزك هيحص أنكم الست القوية اللي مش محتاجة حد فحتى المشكلة اللي أنتي فيها دي كمان هتعدي، صحابك هيقولوا سيبوها سيبوها هي يومين تلاتة كده وهتكون كويسة، أحنا متعودين عليها أنها جامدة وفظيعة، دي بتقف جنبنا أحنا وبتقوينا أحنا وبتسندنا أحنا مش هتعرف تقوي نفسها، بطلي تلعبي دور السوبر وومان، بطلي تفردي عضلاتك، وتقولي أنا جامدة، لأن محدش هيسقفلك في الآخر”.
هيدي كرم: "بطلي تكوني سوبر وومان"
واختتمت هيدي كرم بحكمة، حيث قالت: “مش عيب أن الإنسان يضعف، مش عيب إن الإنسان يقول أنا محتاج مساعدة، مش عيب أنك تقول أنا محتار أنا ضعيف أنا مكسور، كل العيب أنك تفتكري أنك تعرفي تعملي كل حاجة، أو أنك تفتكري طول الوقت أنك أقوى من الظروف، وكل العيب أنك متشوفيش أن العيب طالع منك أنتي وأنك أنتي المشكلة، بطلي تبقي سوبر وومان وأنزلي عالأرض وخليكي طبيعية وأطلبي المساعدة، لأن الناس لبعضها، وزي ما هيقفوا جنبك في يوم، هتقفي جنبهم في 100 يوم”
الموسم الثاني من مسلسل وتر حساس
في سياق منفصل، تواصل الفنانة هيدي كرم تصوير مشاهدها في الموسم الثاني من مسلسل وتر حساس، وكشفت الفنانة هيدي كرم عن أبرز التطورات المنتظرة في الموسم الثاني من مسلسل وتر حساس، وذلك في تصريحات خاصة لـ موقع نيوز رووم، حيث قالت في تصريحاتها: “غادة عادل وكمال أبو رية ورانيا منصور وغيرهم من أبطال جداد هيضيفوا للأحداث منحنى مختلف .. وفي مفاجئات كتير هتحصل هتعجب الجمهور إن شاء الله”.
