عبدالحفيظ: الكرة "مش لغورتم".. ولست مهتمًا بالتعاقد مع لاعبي بيراميدز والزمالك
أكد سيد عبدالحفيظ، المرشح لعضوية مجلس إدارة النادي الأهلي ضمن قائمة الكابتن محمود الخطيب، أن فلسفته في التعامل مع كرة القدم تقوم على الهوية والعين الفنية وليس الأسماء أو “البروباجندا”، مشددًا على أن قيمة الشعار الأحمر أكبر من أي نجم مهما كان اسمه.
وقال عبدالحفيظ في تصريحات تلفزيونية ببرنامج الكورة مع فايق: "الكورة مش لغورتم يعني.. هي شوية حاجات بسيطة، أهمها عين حلوة وقدرات مالية. العين اللي تختار اللاعب المناسب للنادي، وتكون عارفة هو هيضيف إيه، وازاي هيليق بعقلية الأهلي وشخصيته."
وأوضح أن اختيار اللاعبين يجب أن يتم وفقًا لمعايير محددة تتناسب مع هوية الأهلي وتاريخه، وليس بناءً على الشهرة أو الأسماء الرنانة، قائلاً: "أي حد مهما كان اسمه أو نجوميته، ومش مقدر قيمة اللوجو اللي لابسه، بنقوله مع ألف سلامة. الأهلي مش بيقف على حد، واللي مش حاسس بالشعار مش هيكمّل."
الهوية أولاً.. “نكمل بشخصيتنا”
وأضاف عبدالحفيظ مؤكدًا تمسكه بفلسفته الخاصة داخل غرفة الملابس: "أنا عاوز أكمل بهويتي وبشخصيتي وبطبعي وبأسلوبي. الأهلي عمره ما احتاج يغيّر نفسه عشان حد، واللي يدخل النادي لازم هو اللي يتشكل بروح الأهلي مش العكس."
وشدد على أن النادي يمتلك هوية واضحة يجب الحفاظ عليها: "الأهلي ليه طريقة في الإدارة، في الانضباط، في التعامل، وفي احترام الشعار. دي مدرسة مش مجرد منظومة كروية، وأي لاعب لازم يكون عارف إن الانتماء هنا مش اختيار.. دا واجب."
“مش ميّال نجيب من بيراميدز أو الزمالك”
وعن ملف الانتقالات المحتمل خلال الفترات القادمة، كشف عبدالحفيظ عن توجهه الفني الواضح قائلًا: "ممكن بكرة الوضع يختلف، لكن أنا مش ميّال إننا ناخد لاعب من بيراميدز أو الزمالك في الوقت الحالي، إلا لو عقده بيخلص."
وبرر ذلك برغبته في الحفاظ على توازن الأهلي وهويته الفنية بعيدًا عن الجدل المعتاد في صفقات الانتقال بين المنافسين، مضيفًا: "الأهلي ما بيبصش مين عند مين، الأهلي بيشوف مين يليق به. الفكرة مش نكاية في حد، لكن في اختيارات تحافظ على الصورة، لأن الأهلي له كاريزما مختلفة."
واختتم عبدالحفيظ حديثه برسالة قوية للاعبين الحاليين والمحتملين: "مهما كان اسمك أو تاريخك، لو مش مقدّر قيمة الأهلي يبقى وجودك هنا ملوش معنى. اللي مش مقدّر اللوجو، ربنا يوفقه في أي مكان تاني. إحنا نكمّل بهويتنا وبعقليتنا، واللي مش قادر يمشي على ده، الباب مفتوح باحترام."
