السيسي: العلاقة بين التنمية والسلام لا تنفصل.. ونعمل جاهدين من أجل الاستقرار
أكد الرئيس عبد الفتاح السيسي، أن اتخاذ القرار مسؤولية عظيمة، وكلما كانت المسؤولية كبيرة كان القرار خطيرًا، لأن تأثيره كبير، مشيرًا إلى أن ما تحقق من خطوات في سبيل السلام هو بفضل الله سبحانه وتعالى.
وقال الرئيس السيسي، خلال كلمته في احتفالية "مصر وطن السلام" التي أقيمت بمدينة الفنون والثقافة بالعاصمة الإدارية الجديدة: "خلوني أبدأ كلامي بالحمد لله، وأوجه التحية لكل المصريين، وبحيي كل اللي شاركوا في احتفالية مصر وطن السلام، ولو عايزين نشكر، نشكر صاحب الفضل، وصاحب الفضل مش أنا، هو الله سبحانه وتعالى".
القرار مسؤولية
وأضاف الرئيس: "القرار مسؤولية، وكل ما المسؤولية تكون كبيرة، القرار بيكون خطير، لأن تأثيره بيكون كبير. كنا متأكدين إنه في يوم من الأيام هتنتهي مشكلة قطاع غزة، واللي حصل في شرم الشيخ ده فضل كبير من ربنا علينا، ولازم نوجه الشكر لله سبحانه وتعالى".
وتابع الرئيس السيسي قائلًا: "لينا الشرف والفخر إن ربنا ساعدنا، ولما ربنا يساعدك يعني أن قضيتك عادلة ولا يوجد بها ظلم أو افتراء".
واستطرد: "الأيام الصعبة بتمر دايمًا بإرادة الله وحكمته، وعايز أفكركم إنه من أول الأحداث في غزة، كنا متأكدين إن الأيام الجاية هتكون صعبة، وإن رد الفعل في القطاع هيكون كبير. كل الدعوات وقتها كانت بتطلب إن إحنا نقبل إنهم يمشوا من القطاع، ودي كانت لحظة صعبة جدًا، إنك تلاقي نفسك لوحدك، بتفكر لوحدك، والناس مختلفة: يتهجروا ويمشوا ولا ما يتهجروش؟".
وأضاف الرئيس السيسي مؤكدًا: "إحنا كنا على يقين إن الأزمة هتنتهي في يوم من الأيام، وإن ليها مخرج وحل عادل، وموقف مصر النهارده مش ضد الفلسطينيين، بالعكس، ده في صالحهم وصالح الإنسانية والسلام".
شهر أكتوبر شهر جميل
كما قال الرئيس عبد الفتاح السيسي: "شهر أكتوبر شهر جميل، وهو شهر النصر. وعايز أقولكم النصر مجاش بالجيش أو القوة بس، لكن النصر بييجي أولًا بقوة الشعب اللي بيرفض الهزيمة، وربنا بيعينه على النصر".
وأشار الرئيس السيسي إلى أهمية ربط الأجيال الجديدة بتاريخ سيناء وتضحياتها، فقال: "ربطنا سيناء للي ميخدش باله، في 6 أنفاق موجودين تحت القنال، عشان تبقى سيناء والدلتا حتة واحدة، وده إنجاز كبير بيأكد إن التنمية والسلام وجهان لعملة واحدة".
ووجّه الرئيس بتنسيق الجهود بين الوزارات لإطلاق برامج توعوية وتثقيفية للشباب، قائلاً: "لازم يكون فيه تنسيق بين وزارة التعليم ووزارة الشباب، لتنظيم زيارات لأولادنا وبناتنا الصغيرين لسيناء، علشان يشوفوا بعنيهم أرض البطولات اللي اتحررت بدم المصريين".
واختتم الرئيس كلمته قائلاً: "اللي حصل في شرم الشيخ فضل كبير من ربنا علينا، ولينا الشرف والفخر إن ربنا ساعدنا. لما ربنا يساعدك، يبقى قضيتك عادلة، ومافيهاش ظلم ولا افتراء".
وجاءت كلمات الرئيس وسط تفاعل واسع من الحضور في أجواء احتفالية حملت مشاعر الفخر والانتماء، حيث تؤكد مصر مجددًا رسالتها إلى العالم بأنها وطن السلام وحاملة راية الاستقرار الإقليمي والدولي.
