خالد سليم: اتحديت نفسي في شخصية يوسف أبو العزم.. والغناء الأساس

أعرب الفنان خالد سليم عن سعادته الكبيرة بدوره في مسلسل "وتقابل حبيب"، مؤكدًا أن الشخصية التي يجسدها كانت تحديًا كبيرًا بالنسبة له، خاصة أنها تحمل جوانب شريرة لم يقدمها من قبل. جاء ذلك خلال لقاء خاص مع الإعلامية مفيدة شيحة في برنامج "الستات" المذاع عبر قناة النهار.
شخصية مركبة وصعبة
وقال خالد سليم: "دوري في وتقابل حبيب من الأدوار اللي فاكراها كويس جدًا، لأنها كانت المرة الأولى اللي أعمل فيها شخصية فيها كمّ الشر ده الشخصية استفزتني جدًا، وخلتني أتحدى نفسي في إني أعمل يوسف أبو العزم بالشكل اللي يوصّل إحساسه الحقيقي للناس".
وأضاف أن الشخصية كانت ضحية لبيئته وأهله، موضحًا: "يوسف كان ضحية، وبالتالي كل اللي تحت إيده بقوا ضحايا زيه. بقى يمارس اللي اتعمل فيه على أخوه ومراته وبناته، وده اللي خلاني أتعمق أكتر في أبعاد الشخصية النفسية".
التمثيل نصيب.. وأنا بتاع شغل أوي
وأشار خالد إلى أن مشواره الفني مليء بالمحطات التي اعتمدت على الاجتهاد، قائلًا: "التمثيل نصيب، في أدوار كتير اتعرضت عليّ وماحصلش نصيب، لكن أنا مؤمن إن كل حاجة بتيجي في وقتها أنا مجتهد جدًا وبتاع شغل أوي، بحب أدي كل حاجة حقها".
زوجته خيرية تكشف كواليس حياتهما
من جانبها، تحدثت زوجته خيرية هشام عن حياتهما الخاصة، مؤكدة أن خالد من الشخصيات الهادئة التي تحب الاستماع إلى آراء الآخرين:
"خالد بيحب يسمع، بياخد رأيي ورأي مامته ورأي البنات، ولو حد قاله لا بيشوف ويفكر هو برج العقرب، ومش بيحب الانتقاد القاسي".
وأضافت: "خالد عنده أوضة مخصوص في البيت بيقعد فيها يتمرن ويرفع صوته وهو بيحضر للشخصية ساعات بيتقمص الدور جدًا وبيعيش الحالة في البيت، بس أنا متعودة على ده وبحترم معجبينه لأني عارفة إنه ناجح، وده جزء من شغله كممثل".
الغنا هو الأساس
واختتم خالد سليم حديثه قائلًا: "التمثيل ماخدنيش من الغنا، أنا بدأت مطرب، وشكرًا لكل اللي ساعدوني أدخل التمثيل من خلال مسلسل سنة أولى نصب مع المخرجة كاملة أبو ذكري الغنا هو اللي عرف الناس بيا".
وأوضح أنه وقّع عقدًا لإصدار ألبوم غنائي لكن تم تأجيله خمس سنوات، مضيفًا: "من 2019 بدأت أنزل سينجل كل سنة، وآخر حاجة كانت دويتو مع الفنان الكبير عبد الباسط حمودة".