مفاجأة .. تعرف على أجر يسرا في فيلم الإرهاب والكباب
تحدثت الفنانة يسرا عن بداياتها في مجال الفن والصعوبات التي واجهتها خلال تلك الفترة، بعد مشاركتها في عدد من الأعمال التي لم تحقق النجاح المنتظر، بجانب حديثها عن ذكرياتها مع فيلم الإرهاب والكباب والأجر الذي حصلت عليه من هذا العمل ، وذلك خلال ندوة تكريمها بمهرجان الجونة السينمائي في دورته الثامنة.
بداية أعمالها
وقالت يسرا خلال ندوتها : أنا عملت 25 فيلم في بداية حياتي وكلهم سقطوا سقوط ذريع، قلت طب هكمل ليه والغلط جاي من مين؟، بدأت أحاسب نفسي وروحت المعهد وأنا مش تلميذة فيه .
وعن علاقتها بالجمهورقالت: الوقت علمني إن حتى لما يبقى في حاجة مضايقاني الجمهور ملوش ذنب، إنتو ليكوا حق عليا إلى حد ما وإني أكون معاكم، بس إن حياتي تكون مفتوحة تمامًا قدامكم دي حاجة مش هتريحني، والنهاردة بنقول كلام على السوشيال ميديا وبيتقص وكل واحد بيعمل حاجة على مزاجه ف ده بيخليني أكون واخدة بالي أكتر.
أما عن استعانة فستانها من فيلم الإرهاب والكباب لعرضه في مهرجان الجونة، قالت: أنا فتحت ستين شنطة عشان أطلع فستاني في الإرهاب والكباب عشان يحطوه في المعرض بتاعي في مهرجان الجونة، لما دخلت المعرض شوفت حياتي من ساعة ما اتولدت، أنا فخورة إن فات 50 سنة وأنا محستش بيهم، استفدت من الرحلة بتاعتي وحسيت إني عملت أسطورة للناس اللي بعدينا.
وواصلت: ممتنة أوي لكل الناس اللي أضافوا لحياتي من يوم ما مثلت لغاية دلوقتي من غير حب الناس مفيش حاجة مهما عملت، مفيش حد ممكن يوصل لخمسين سنة شغل من غير حب الجمهور وزمايلي.
أجر يسرا في الإرهاب والكباب
كما كشفت يسرا عن أجرها في فليم الإرهاب والكباب، وقالت: وحيد حامد بعتلي على فيلم الإرهاب والكباب ولقيت الاسكريبت شخصيتي مكتوبة فيه فتاة ليل مشهد واحد، أخدت أجر 10 جنيهات، وصممت فستاني الأحمر في يوم واحد، وطلع العمل زي ما أنتو شوفتوه وبرغم إنه مشهد واحد قولت لـ أستاذ وحيد أنا جاهزة أمثل معاك وإديني 10 جنيهات أجر.
إعجاب إلهام شاهين بمعرض يسرا الفني
في سياق متصل، أعربت الفنانة إلهام شاهين عن سعادتها بمعرض يسرا الفني المقام في مهرجان الجونة السينمائي، وذلك من خلال تصريحات تليفزيونية لموقع بصراحة اللبناني، حيث قالت إلهام شاهين: “فكرة المعارض الفنية في المهرجانات فكرة رائعة كل سنة بيكون في معرض في مهرجان الجونة للفنانين الكبار بصورهم وأعمالهم .. لكن المرادي معرض يسرا تحفة ومتنظم حلو أوي فعلا من أروع السنين .. صور يسرا الفنية والشخصية ومع صحابها رائعة .. الفيلم اللي معمول عنها جميل مافيهوش لحظة ملل في إيقاع وتلخيص لتاريخها الفني لمدة 50 سنة .. رائع جدًا حقيقي برافو”.
