أنا مقاطعة.. الفنانة فيدرا: لبسي ومكياجي وروتين شعري منتجات محلية
أكد الفنانة فيدرا، على التزامها بمقاطعة المنتجات التابعة للشركات، الداعمة للاحتلال الإسرائيلي، والمؤيدة لحرب الإبادة على قطاع غزة.
وكتبت فيدرا في منشورا لع عبر حسابها الرسمي على منصة إكس: علشان كل اللي ضد المقاطعة و كل شوية يدخل على بوست من بتوعي علشان يا يكذبني، يا يقوللي الكلام المحفوظ:
أولاً: أنا بطّلت أشتري أي حاجة من أي دولة بتدعم الكيان. كل هدومي وكل اللي بستخدمه سواء مكياج أو لبس أو حاجة للشعر — بجيبه بعد ما أعمل بحث وأتأكد إن الماركة دي مش في قوائم الدعم.
وتابعت: الصالون اللي بعمل فيه شعري مش سلسلة أجنبية ولا فرع كبير — ده مصري خالص، يا بييجوا ليا البيت، يا بروح لهم في محلهم. كلهم مصريين وليهم فرع واحد عندنا، والخامات هما اللي بيدوّروا عليها مخصوص علشان تكون براندات مش في المقاطعة. وشكراً للكوافير عماد مجدي اللي بيلف في مصر ويجتهد و يدور على منتجات مناسبة — ناس بتحب شغلها وبتحترم موقفي.
وأضافت: بالنسبة لِسؤال “طب والناس اللي بتتسرح وتتضرر؟” أنا شايفة إن في أولويات. أولويتنا الإنسانية إن فيه ناس بتتقتل وبتتشرّد ودي حاجة أهم من أي فقدان وظيفة مؤقت. وبعد كده، الناس اللي بتترك شغل في الشركات دي بتلاقي فرص تانية عند براندات محلية بتكبر — ده مش كلام، شركات مصرية اتوسع شغلها لما الناس اختارت المنتجات المحلية. يعني
وأردفت الفنانة فيدرا المقاطعة مش هدفها تدمير، الهدف إنه نحفّز صناعتنا ونبني قدرة محلية أقوى..أنا عمري ما قارنت نفسي بحد، أنا إنسانة بتكلم عن أفعالي الشخصية. أنا مسؤولة عن قراراتي و ماليش دعوه بغيري.
وأكملت وبالنسبة لحاجات زي الموبايل والكمبيوتر: دي للأسف حاجات أساسية في حياتنا ومفيش ليها بدائل وطنية بنفس القوة لحد دلوقتي. بس الحقيقة إحنا قلبناها ضدهم: السوشيال ميديا اللي اخترعوها بقينا بنستخدمها سلاح نفضح بيه جرائمهم، وصوت فلسطين بقى واصل للعالم كله.
واختتمت حديثها قائلة: كل واحد حر في قراراته. أنا مش بهين حد ولا بزايد على حد، ومش بطلب حد يعمل زيّي. بس لو أنا قررت أخد موقف بالمقاطعة فأنا مقتنعة بيه و الحقيقه ان أنا ما أخدتش الطريق الأسهل. لو حد شايف ده سخيف، ده رأيه وهو حر فيه.. وشكرًا لكل اللي بيسألوا بجدية وباحترام، وشكرًا لكل اللي بيقدّروا الموقف ويحترموا اختلاف الآراء.
