صابرين جابر لـ نيوز رووم: هي سوشيال ميديا ولا “سوشيال مأساة”؟

قالت صابرين ريتويته قلبت حياتي، هي سوشيال ميديا ولا “سوشيال مأساة”؟

بقينا في زمن بيتبني فيه الحب من ريتويت ولايك وإيموجي قلب.
زمن العلاقات اللي بتبدأ بكلمة بسيطة وتنتهي بجرح كبير.
بنت تعمل ريتويت لتويتة شاب كاتبها عن “الاهتمام أهم من الحب” هو يدخل يشوفها تعجبه طريقتها يرد تتكلم تضحك…
ومن غير ما يحسوا  بقوا عايشين علاقة كاملة من ورا الشاشة.

بس بعد شوية الواقع  بيظهر الردود تقل الكلام يبرد والمشاعر بتختفي .
هي تفضل مستنية الرسالة اللي ماجتش وهو يختفي في مبررات “كنت مشغول” "كنت تعبان” "ماخدتش بالي”.
وهنا تبدأ الحكاية تاخد منحنى تاني… وجع من نوع صامت .

الحب اللي بيتولد على السوشيال ميديا دايما ناقص حاجة.
ناقص العيون اللي بتتكلم قبل اللسان وناقص المواقف اللي تختبر الصدق وناقص اللمسة اللي بتقول “أنا هنا”.

بس الحقيقة؟
مش العيب في السوشيال ميديا العيب فينا لما نخلط بين الإعجاب الحقيقي والإعجاب اللحظي.
بين الاهتمام اللي نابع من قلب والاهتمام اللي نابع من ملل.

يا بنات… متستسلموش لكلام سهل ولا لإحساس مصنوع.
ويا ولاد… خليكم صريحين لأن الكلمة اللي بتتقال بنية لعب ممكن تسيب جرح حقيقي.

في الآخر السوشيال ميديا مجرد وسيلة…
بس إحنا اللي نقرر:
تبقى بداية حلوة لحكاية بجد؟
ولا “سوشيال مأساة” جديدة… نهايتها بلوك .