ياسمين عز تثير الجدل من جديد: "اعملي تراميسو لجوزك"
أثارت الإعلامية ياسمين عز، الجدل مجددًا خلال حلقتها الأخيرة من برنامجها كلام الناس المذاع عبر شاشة MBC مصر، بعدما وجهت نصائح مباشرة للزوجات حول كيفية التعامل مع أزواجهن، مؤكدة أن الرجل يستحق نفس القدر من الاهتمام الذي تمنحه الزوجة لأبنائها وربما أكثر.
جوزك أولى من اللانش بوكس
قالت عز في حديثها: "النهارده إجازة وولادك مرحوش المدرسة، وجوزك كمان إجازة.. قومي اعملي له تراميسو، طلعي النسكافيه وصوابع الست، واعملي الحلو لجوزك زي ما بتعملي لولادك."
وأضافت ياسمين عز: "جوزك نزل يصلي الصبح، جلبيته متكوتش.. عيب! هو مش متجوز؟ قومي شوفي طلباته، اهتمي بيه زي ما بتهتمي بولادك. إنتي بتقومي من الفجر عشان تحضري لانش بوكس قد الحلة لولادك، وجوزك يا عيني مخدش حتى لقمة."
الزوج مش أقل من العيال
هاجمت ياسمين عز، فكرة إهمال الزوج، مشيرة إلى أن بعض الزوجات يفرطن في الاهتمام بأبنائهن على حساب أزواجهن، قائلة: "بتحطي لابنك نص فرخة كاملة، وجوزك الغلبان عمرك ما عملتِ له حتى سندوتش جبنة بخيار. بتحطي للسلحف الصغير نص فرخة وتسيبي الراجل من غير ولا لقمة. هل ابنك ده صنايعي في ورشة عشان ياخد كل الأكل، وجوزك اللي شايل البيت ملوش نصيب؟"
واستطردت ياسمين عز، قائلة: "اللانش بوكس اللي بتعمليه لابنك ده مش لانش بوكس.. ده صباحية بنتك العروسة! طب هل إنتي بتعملي كده لجوزك؟ هل بتفتكري إنك ممكن تجهزي له صندوق أكل زي اللي بتجهزيه لعيالك؟"
التراميسو عنوان الاهتمام
اختتمت ياسمين عز، رسالتها بلهجة مباشرة، قائلة: "قومي وهزي طولك، اعملي تراميسو لجوزك، الراجل مش محتاج منك غير الاهتمام، لو بتقدري تعملي مجهود كبير عشان عيالك، يبقى جوزك أولى. هو اللي بيشقى وبيصرف وبيتحمل، فلازم يلاقي رعاية واهتمام زي ما بتعملي لأولادك."
جدل متجدد حول تصريحات ياسمين عز
تصريحات ياسمين عز، دائمًا ما تثير الجدل على مواقع التواصل الاجتماعي، إذ يرى البعض أن حديثها "رجعي" ويعزز فكرة تبعية المرأة للرجل، بينما يراها آخرون دعوة واقعية لإعادة التوازن داخل الأسرة وتقدير الزوج الذي غالبًا ما يتم تهميشه في ظل ضغوط الحياة اليومية.
وفي وقت سابق، شنت الإعلامية ياسمين عز، هجومًا حادًا على أحد مدرسي اللغة العربية، بعدما قرر المدرس أن يستبدل درسًا نحويًا مقررًا على طلابه ليقدّم لهم محاضرة مليئة بالانتقادات والإيحاءات المسيئة للمملكة العربية السعودية.
