بعد غياب طويل.. ياسمين نيازي تعلن طرح أحدث أعمالها الغنائية
نشرت المطربة ياسمين نيازي منشورا كشفت فيه عن سبب ابتعادها في الفترة الماضية عن تقديم بعض الأغاني مؤكدة إلى أنها سوف تصدر أغنية جديدة خلال الفترة المُقبلة، كما أشارت إلى أنه يوجد بعض الأشخاص الذين يحاربونها ووجهت إليهم بعض الكلمات.
وكتبت ياسمين نيازي عبر صفحتها الرسمية على موقع التواصل الإجتماعي فيس بوك وعلقت قائلة: بوست طويل شوية وأتمنى تشوفوه بقلبكم قبل عيونكم الناس اللي بتقول إنتي فين؟.. أنا إنسانه مينفعش أغني أي شيء مش مقتنعة بيه عشان كدا بتأخر.. غير إن الظروف الإنتاجية مبقتش زي زمان المطرب مننا بيحتاج دعم معنوي أكتر من مادي عشان يعرف يستمر.
وتابعت حديثها: أنا أحيانًا بضعف وبقول خلاص بس بكمل من كلام الناس اللي بتحبني وبتدعمني سامحوني أنا بفضفض معاكم لأول مرة ومش مكسوفه لأنكم أخواتي وأصدقائي ولو نجحت ف يوم من الأيام ف كان بسببكم أنتو بعد توفيق ربنا.
وأضافت ياسمين نيازي: بحاول أبذل كل ما في مقدرتي أني أكون موجودة وعارفة إنكم بتعذروني رغم كومنتات كتير وكلام سلبي كتير بيكسر ويوجع القلب أول ألبوماتي كان شكلك هتوحشني 2007 وبعده حبك عامل سيطرة ف 2011 كسرو الدنيا الحمد لله.. وبعدها توقفت شوية لانفصالي عن الشركة اللي كنت معاهم لأسباب كتير ومع ذلك مقولتش زي غيري ف الصحافه لاني زي م قولت بحترم نفسي وشغلي قبل أي شيء وبعدهم نزلت سينجل عاند وكابر 2016 وبعد كدا عملت ميني ألبوم اسمه هرقص مصر مع شركة محترمة وحقق نجاح كويس الحمدلله رغم إن الدعاية كانت ضعيفة جدًا.. وبعد كده عملت مسلسل سابع جار وكان تجربة جميلة ووصلت للناس ورجعتني للناس وغنيت أغنية المسلسل في ناس مع هاني عادل.
وأردفت: وبعد كدا نزلت سينجل (كلام الحب في 2020) وبعدها عملت أغنية فيلم صندوق الدنيا 2021اسمها ( وسط البلد) وكانت تريو مع اتنين فنانين أنا بحبهم جدا الاستاذ عبد الباسط حمودة ووائل الفشني بس للأسف مخدوش حظهم الغنوتين لأنه كان توقيت الكورونا.
بروحلك ومالي العين
وواصلت ياسمين نيازي : مع ذلك كملت وفي 2023 تعاقدت مع شركة تاني لتنفيذ أغنيتين ( بروحلك، ومالي العين ) والحمدلله لاقوا نجاح ورجعوني بشكل برضو يرضيني رغم الدعاية اللي كانت ( صفر) لأني قدمت شكل جديد وسط اللي موجود من مهرجانات و دلوقتي شغاله علي أغاني جديده قريب هتنزل أول أغنيه فيهم وبتمنى من ربنا النجاح بيها فـ سامحوني لو طولت عليكم احنا ف حرب وتخيل انك بتحارب لوحدك فـ أعذروني لو بتأخر أحيانًا بس من حبي فيكم وإحترامي لـ اللي عايزه أقدمه من موسيقي بتمنى تعيش زي اللي عاش لغاية النهارده من مشواري.
وتابعت ياسمين نيازي: كلامي ده لأن ناس كتير فكراني بطلت غنى وناس بتحاربني من تحت الترابيزه زي ما بيقولو بالبلدي.. بس كل اللي بطلبو منكم تكونو رحماء شويه بس في كومنتاتكم لأي فنان لأنكم متعرفوش التفاصيل والحرب اللي بيعيشها وبالأخص لو عايز يكمل ف شكل معين يرضيه ويرضي جمهوره.
واختتمت حديثها: سامحوني تاني طولت عليكم بس كلام بقالي سنين شيلاه جوا قلبي ومخليني حزينه أغلب الوقت بحبكم جدًا ومكمله بدعمكم ليا وحبكم وزي م في ناس بتكرهني ومبتحبليش الخير والنجاح والتواجد كأني هاخد مكانهم مثلًا في ناس بتحبني وتدعمني وليكم كل الشكر من قلبي.. أتمني كلامي يوصل لأي إنسان بيحاول يحبطني أنا بعمل اللي عليا والتوفيق بتاع ربنا وبرضو ربنا يلهيكم عني بكل شيء تتمنوه لنفسكم المهم تسيبوني بس أعمل الحاجه اللي بحبها وهي أني أغني وأنا برضو ف حالي ماليش دعوه بـ أي حد ربنا يوفق ويكرم الكل دي حاجة عمرها ما هتاخد مني ولا من رزقي.
