الأول بدون جدتها.. إيناس عز الدين تحتفل بعيد ميلادها
تذكرت الفنانة إيناس عز الدين جدتها التي بمثابة والدتها بكلمات مؤثرة، خاصة وهي تحتفل الليلة بعيد ميلادها، حيث نشرت مجموعة صور تجمعهما بالذكاء الأصطناعي، عبر حسابها الرسمي على موقع التواصل الإجتماعي فيسبوك.
إيناس عز الدين ترثي جدتها
ورثت إيناس عز الدين جدتها قائلة: “انهاردة أول عيد ميلاد ليا يمر وإنتي مش في الدنيا يا ماما ديدا يا أمي اللي ما عرفتش في حياتي أم غيرها ياللي عوضتيني عن فقدان الأم و الأب والدنيا بحالها .. طول حياتك وسترتيني أنا وأختي و ربيتينا أحسن تربية و إتكسر ضهرك علينا لآخر يوم في حياتك و ضحيتي من أجل تربيتنا بكل ما هو نفيس و غالي وكل ما تملكي”.
السنوية الأولى لجدتها
واستكملت إيناس عز الدين حديثها قائلة: “وبكرة سنويتك الأولى يا نور عيني وروح قلبي يا أعظم أم جت في الدنيا إنتي الأم اللي قررت تشيل شيلة مش بتاعتها ومش بس كده .. دي عاشت تحارب علشان تحمي الشيلة دي اللي هي أنا وأختي و تسترهم وشيلة أنا على يقين إنك قابلتي ربنا بيها و هيكرمك عليها آخر كرم وصدقيني إنتي ما فارقتينيش ثانية عايشة ببركة دعائك .. و ربنا بيرزقني و بيكرمني آخر كرم و فضل لأنك قابلتي وجه رب كريم و دعواتك ليا انا وأختي على لسانك .. بس الدنيا جت علينا قوي يا ديدا من بعدك”.
عيد ميلاد في المحكمة
وأوضحت إيناس عز الدين قائلة: “لدرجة إن أول عيد ميلاد ليا وإنتي مش في الدنيا انا مقضياه أنا و أختي في المحكمة .. علشان أمي الحقيقية قررت تحتفل بعيد ميلادي بعد وفاتك احتفالية ضخمة و تبقى أول جلسة ليا قدامها النهاردة في المحكمة .. كل اللي عشتي تحميني منه أنا و أختي و كنتي حائط دفاع و صد و بتاخديه لوحدك علشان تحمينا و يا ما سنين إتعمل فيكي و كنتي بتتحملي علشان تمنعي عننا الشر و الأذى .. للأسف بيحصل فينا من بعدك بس برضوا أنا قدها و قدود لآخر نفس علشان أنا تربيتك و بنتك .. إنتي الست العظيمة القوية اللي علمتني أواجه الدنيا بحالها مادمت على حق .. فضلاً وليس أمراً هديتكم ليا في عيد ميلادي تكون دعوة للأم المثالية في نظري جدتي ماما ديدا بكرة سنويتها الأولى .. الصور دي أعظم هدية جتلي في عيد ميلادي من صديقي اللي ربنا يكرمه و يبارك في عمره أحمد شرقاوي مهما شكرتك مش هوفيك حقك كفاية دموعي وأنا شايفة الصور الله يكرمك و يفرح قلبك”.
