الاندبندنت وومان في الأزهر..سيدات يطالبن بالمساواة في البعثات الخارجية كالرجال
لماذا تقتصر البعثات والإعارات في الأزهر الشريف على الذكور وتحرم منه الإناث؟، سؤال في إحدى المجموعات التي تضم مدرسي الأزهر، تسبب في حالة من الجدل خاصة مع مطالبة معلمة المساواة مع الرجال في الإعارات الخارجية.
المساواة التي بحثت عنها المعلمة من وجهة نظرها قوبلت بحالة من الاستنكار بين المعلمين والمعلمات على حد سواء.
وقال أحد المعلمين: «يعني عاوزة تسافري في ادغال افريقيا وتقعدي بالسنوات في ظروف لا تحتمل بعيد عن بيتك واولادك و ع قلبك هيبقي زي العسل و لو انتدبوكي هنا سنة في مكان بعيد شوية تقولي حرام عليكوا هو مفيش رجالة .. ده عندنا بينتدبوا اتنين رجالة كل سنة في مناطق بعيدة عشان ميطلعوش ستات رغم العجز الصارخ في معهدنا ولكن مش مهم المهم طلع الاتنين رجالة وبهدلهم وهات مكانهم 3 أو 4 ستات عشان تحاول تسد العجز اللي أنت عملته بانتداب الرجالة اصلا عشان الستات ميتعبوش».
وتابعت أخرى: «لأن الإناث مش عاوزين يروحوا مراقبات فى مكان بعيد المواصلات بتتعبهم».
وتساءل آخر: هل يعقل أن الأنثى تسيب بيتها 3 سنوات؟؟ ثم انتوا شايفين البعثات من كترها يعني.
بينما وجد البعض المنشور محاولة لنشر الفجور قائلا: «فيه قضية اسمها نشر الفجور.. ممكن البوست ده يتكيف على هذا الأساس».
فيما تعجب البعض من رفض النقل والانتداب الداخلي لسد العجز في مقابل الرغبة في الخروج للإعارة قائلا: «سبحان الله !!!!!!! مش عاوزين تتنقلوا نصف كيلو لسد العجز، عاوزين تسافروا تااااني قارة».
كرامتك مصانة
بينما قال أحد المعلمين أن سبب تخصيص الإعارات للرجال هو صون كرامة المرأة لا تقليلا منها قائلا:«علشان.. الأصل إنك معززة مكرمة مصانة وأميرة. فى بيتك تربى أولادك وتراعى زوجك غير مكلفة بالاتفاق وجوبا.. بلاش تدوروا على البهدلة. وبلاش اشمعنا. قال الله تعالى: «وليس الذكر كالأنثى».. العملية فسدت حينما تذكرت الأنثى.. وتأنث الذكر».
خلتونا نتبهدل مراقبة عايزين كمان ابتعاث!
إحدى المعلمات استنكرت المنشور قائلة: «كنا نجلس في بيوتنا معززين والرجال الي تراقب خلتونا نجري في المواصلات 40 يوم عوزين كمان ابتعاث الله المستعان».
السفر دون محرم حرام
بينما أرجع البعض الأمر للأحكام الشرعية ومنها عدم جواز سفر المرأة دون محرم، فقالت: «لأن سفر المرأة بدون محرم حرام ده غير أن الراجل يعول أسرة إنما الست مش ملزمة شرعا بإعالة أسرتها».
وأضافت أخرى: «معلش أصل أخدنا وفي كتاب الدين واحنا صغيرين ان لا يجوز سفر المرأة بدون محرم، وبعدين انت عارفه البعثات والاعارات بتروح فين ده الرجاله بيترفع عليهم سلاح وبيتثبتو يبقي الستات مصيرهم ايه، احنا علي العام خلينا ساكتين ده لما يتم الانتداب لأماكن بعيدة بتحصل مهاااازل ومضايقات واخر قلة ادب فا انت عاوزه تخرجي بعثه وإعارة، الله يلعن اللي خلي الست تنزل للشغل وتتعامل بالندية ده وتطالب مالايطيق الرجال تحمله..
نادرا لما بكتب كومنت بس حرفيا البوست مستفز
ما هي شروط الابتعاث في الأزهر؟
1- أن يكون على درجة مالية بموازنة الأزهر الشريف.
2- أن يكون أمضى ثلاث سنوات على الأقل من تاريخ مباشرة العمل في مجال التعليم أو الدعوة أو الإرشاد الديني أو في عمل يكسبه خبرة فيما يسند إليه من أعمال بالخارج في ظل التخصص المطلوب.
3- ألا يقل تقريره الفني في العامين السابقين مباشرة على عام التقدم للمسابقة عن 85% وفي حالة عدم وجود التقريرين المطلوبين يؤخذ بآخر تقريرين فنيين بذات الدرجة.
4- أن يكون قد أدى الخدمة العسكرية أو أعفي منها نهائيا، والمعفى مقدما يلزمه تقديم شهادة من القوات المسلحة بالموافقة على سفره.
5- أن يكون صالحا للإيفاد من الناحية الصحية وفقا لشهادة طبية معتمدة من مستشفى حكومي.
6- ألا يكون قد قضى بالخارج مدة عشر سنوات أو أكثر في تعاقد على نفقة الجهة المتعاقد معها.
