الأطباء رفضوا يعالجوني.. إنجي عبد الله تعلن معاناتها من ورم حميد في جذع المخ

كشفت الفنانة إنجي عبد الله عن معاناتها من ورم حميد في جذع المخ، مشيرة إلى أنها تعاني منه منذ سنوات ورفض الأطباء علاجها.

كل الدكاترة في مصر وبره مصر رفضوا يعالجوني

وكتبت إنجي عبد الله عبر حسابها الرسمي بموقع فيسبوك: “عدى ٦ شهور بحاول اتعالج للمرة الثانية من ورم في جذع المخ، وهو مش سرطان، هو ورم حميد، لكن موجود في أخطر مكان في المخ، للأسف كل الدكاترة في مصر وبره مصر، أساتذه في مجال الأورام والمخ والأعصاب، رفضوا يعالجوني، لانى اخدت كل جلسات الاشعاع والكيماوي المسموح ليا وللمكان الصعب ده سنه 2019 وكنت فاكرة خلاص أنا تمام، لكن للأسف رجعت لي اعراض اسوء بكتييير من زمان”.

فقدت الإحساس بالجنب اليمين

وأضافت إنجي عبد الله كاشفة عن معاناتها: “أنا فقدت الإحساس بالجنب اليمين، وصعوبة في البلع وكهربا في جسمي كله لما بعمل أي حركة بسيطة حتى لما بحرك عيني، وفي حاجات تانيه كتير، حتى أنا رجعت للمستشفى اللي اتعالجت فيه قبل كده، بنصيحة من دكتور تامر النحاس،  اللي هو شخصيا رفض يعالجني، والمستشفى طلبت منى امضى اقرار، إني مسئولة تماما عن كل اللي ممكن يحصلى لو اتعالجت، طبعا مشيت من الخوف”.

 أختي عندها ورم في الرئة والمخ مرحلة رابعة 

وتابعت: “دلوقت انا مع الدكتور الوحيد اللي وافق أنه يجرب علاجات خفيفة تلطيفيه لمحاولة تحسين جودة الحياة مع اننظار معجزة، أنا مش بحاول اتعالج علشان متمسكة بالحياة، أنا بس تعبانة جدا بقالي كتير وبدعى ربنا بحاجة واحدة بس. اللهم لا نسألك رد القضاء ولكن نسألك اللطف فيه الشخص اللي واقف جنبي وبيساعدني أن اعمل أبسط الحاجات اليومية اللي خلاص بقت مستحيلة اني اعملها لوحدي هي أختي اللي عندها ورم في الرئة والمخ مرحلة رابعة، وكنت فاكرة أن أنا اللي هخلي بالي منها”.

الحياة صعبة جدا وراضية بقضاء ربنا

واختتمت إنجي عبد الله حديثها قائلة: “أنا حالتي بتتاخر كل شوية، والمرة دي شفت حاجات صعب انى حتى أوصفها، أنا راضية بقضاء ربنا الصعب أوي أوي ليا ولأختي لكن الحياة بجد صعبه جدا ومفاجئتها اصعب”.