عندها 65 عامًا.. حكاية كابتن فاتن أشهر سائقة من القاهرة للاسكندرية
شاركت الدكتورة علي زكي كبير أطباء التفتيش على اللحوم منشورًا عبر منصات التواصل الاجتماعي، أشادت به بسائقة أحد تطبيقات النقل الذكي المخصصة للسفر عبر المحافظات، وتبلغ كابتن فاتن سائقة النقل الذكي 65 عاما، وقيادتها متزنة وهادئة، وتتمتع بثقة كبيرة تكسر الصورة النمطية السائدة لقيادة النساء.
سائقة ستينية تكسر الصورة النمطية للنساء وتثبت تميزها في القيادة
وكتبت دكتورة شيرين في منشورها عبر فيسبوك: طلبت رحلة من أحد تطبيقات النقل الذكي، جالي عرض من الست الجميلة دي بصراحة قلقت وقولت لنفسي هتسافري إسكندرية وست سايقة بيكي وإنتي عارفة سواقة الستات، وكمان لقيت سنها مكتوب 65، قلت ده يا صباح الشلل المروري.
وتابعت: لكن حاجة كده جوايا خلتني أقبل الرحلة وأكلمها لقيتها واثقة في نفسها ثقة غير طبيعية فاتوكلت على الله ونزلت من بيتنا لقيت العصفورة الجميلة دي واقفة تلمع عربيتها وفاتحة لي شنطة العربية علشان أحط شنطتي، بشوشة جميلة أنيقة راقية وأول ما شافتني قالت لي هاتي بوسة، وأقدم لكم كابتن فاتن القمر دي، ثقة على الطريق لا حدود لها، قيادة متزنة متحسش بيها، ثبات والتزام بقواعد المرور.
وأضافت: طول السكة بتغني وتضحك وتحكي لك طرائف من حياتها، اندمجت معاها محستش بالطريق نهائي ووصلنا بسلامة الله في توقيت رائع، وكمان طلعت إسكندرانية وبنتها متزوجة جنبي في المريوطية وحافظة الطريق والمكان اللي أنا رايحاه، كابتن فاتن بتسافر من القاهرة وإسكندرية لأي محافظة في مصر وأنا برشحها لكم بقوة، ما شاء الله مريحة جدا في السفر ومكيفة وعاملة ألبوم ضخم يوافق كل الأذواق اللي عايز يسمع قرآن أو أغاني وبتخليك تختار اللي يعجبك وتتعامل معاك كأنك صديق مش مجرد راكب معاها.
أي بنوتة أو ست أو أسرة عايزة تسافر اطلبوا كابتن فاتن على ضمانتي وهتدعوا لي والله وهتقضوا وقت تحفة وممتع في السفر.
