هاني رمزي: والدي كان كمسري وعلمني التحدي.. وفقدته أثناء فترة احترافي| فيديو

كشف الكابتن هاني رمزي نجم منتخب مصر والنادي الأهلي السابق، عن تفاصيل مؤثرة من طفولته ونشأته داخل أسرة بسيطة مليئة بالتحديات، مؤكداً أن والده كان له الدور الأكبر في تكوين شخصيته القوية وحبه للنجاح.

نشأة هاني رمزي وسط أسرة بسيطة  

وقال رمزي في لقائه مع الإعلامي معتز الدمرداش ببرنامج "ضيفي": «البيئة اللي اتربيت فيها كانت كلها تحدي، والسبب والدي الله يرحمه، كان راجل مكافح اشتغل كمسري في هيئة النقل العام قبل ما يترقى ويصبح مفتش، وكان بيصحى الساعة 3 الفجر عشان يبدأ يومه ويرجع 4 أو 5 العصر.. شغلانة صعبة جدًا لكن كان بيتحملها عشان يوفر لنا حياة كريمة».

وأضاف رمزي: «مرة طلبت أروح معاه الشغل، قال لي يا ابني أنا بقف في الأتوبيس باخد تذاكر من الناس، هتمشي معايا؟! وفعلاً أخدني وقعدني جنب السواق مرتين، وأنا كنت مبسوط جدًا كطفل صغير، الموقف ده علّمني يعني إيه تعب ومعاناة، وإن النجاح بييجي بعد كفاح كبير».

هاني رمزي: والدي علّمني التحدي

واستكمل رمزي حديثه بتأثر: «والدي زرع فيا روح التحدي من صغري .. لما كنت بفكر أسيب الكرة في أي وقت كنت بفتكر شقاه وتعبه، وده كان بيديني دافع أكبر عشان أكمل».

وعن أصعب لحظات حياته، قال: «أنا فقدت والدي وأنا في ألمانيا أثناء فترة احترافي، كان تعبان جدًا لكن كان بيرفض يبلغني عشان ما يقلقنيش، وكان يقولهم سيبوا هاني في حاله، لكن في آخر أيامه طلبهم يتصلوا بيا، ورجعت بسرعة على مصر، للأسف وصلت المطار وما لحقتش أشوفه .. دي من أكتر الحاجات اللي أثرت فيا». 

 رحيل والده غير حياته للأبد

واختتم قائلاً: «والدي كان السبب في شخصيتي دي، في قوتي، في نجاحي، رباني على الصبر والكفاح، وده اللي خلاني أحقق حلمي وأبقى لاعب معروف».