محمد سامي عن منى زكي: "متعلمة راقية متطورة مش بتمثل و خلاص"
أعرب المخرج محمد سامي عن تقديره لمسيرة النجمة منى زكي الفنية، بجانب أنه يراها نجمة فارقة عمن حولها من نجمات صف أول، وذلك من خلال منشورًا عبر حسابه الرسمي على موقع التواصل الإجتماعي فيسبوك.
محمد سامي يتساءل عن جمال منى زكي
حيث قال محمد سامي خلال ذلك المنشور: “ليه منى زكي ؟ .. كنت بتكلم مع من زكى بسلم عليها و قعدت أتكلم معاها شوية ، وأدخل من موضوع لموضوع و بعد ما قفلت سألت نفسي أكثر من سؤال، ليه منى زكي فارقة كتير ؟، ليه عندها بريق من نوع خاص ، ليه هي النجمة الأهم و الموهبة الأكبر”.
واستكمل المخرج محمد سامي حديثه قائلًا: “ليه هي سابقة جيلها بفرق كبير جدا رغم إن جيلها قوي و فيه زميلات نجوم حقيقيين علي جميع المستويات وموهوبين و ناجحين و قدموا أعمال مهمة ولكن محدش وصل لأنه يبقى منى زكي، ليه فضلت من أول يوم ليها كممثلة لحد النهاردة أيقونة يصعب تكرارها أو القرب من حجم إسمها و مكانتها على المستوى الفني أو على مستوي النجومية و الموهبة أو حب الجمهور، ليه منى زكي أكثر ممثلة تصدقها و تتوحد معاها، ليه لو فكرت في ممثلة تلاقي صورة منى زكي هي أول صورة تيجي في بالك”.
منى زكي تختلف عن نجمات جيلها
ليجاوب محمد سامي عن كل هذه التساؤلات قائلًا: “بإختصار لأن منى زكي مثقفة متعلمة راقية متطورة مش بتمثل و خلاص ولا بتظهر و خلاص ولا بتتكلم و خلاص ولا مهتمة بتفاصيل الناس الفاضية، ست كلامها مرتب وأسألتها ليها معنى وهدف وأنا بتكلم معاها مابلاقيش لحظة من النقاش دخل في جدل بلا هدف أو كلام من أجل الكلام و خلاص ، الست دي وهي بتتكلم عن الفن تحب تسمعها و لما توصف الفن تفرح إنك تنتمي ليه من طريقة كلامها عنه، لما تناقش معاها أي موضوع تلاقي وعي و حكمة و تحضر وثقافة، ست ناجحة و زوجة و أم ناجحة، لما تتفرج علي أي مشهد ليها بتلاقيها خلته مش عادي، بتشوف تحضير و مذاكرة ورؤية و مجهود واضح وعلام و عقل مترتب و ده بيبان في أصغر التفاصيل ، بتقدم أي مشهد صعب ببساطة و شياكة من غير تصنع أو تشتيت، طريقتها في النقد شيك و تبسيطها لصعوبة أدوار عملتها بيدل علي ثقتها في نفسها اللي بلا حدود ، حتى لما نبص للقاءاتها أو لدورها في المجتمع أو كلامها في ندواتها حتي في الإعلانات اللي قدمتها أو أفلامها و مسلسلاتها او لبسها في أي ظهور ليها حتي لو مش رسمي هتلاقيها بتعرف تنتقي وهتلاقي دايما في جودة ورمز مشرف للست المصرية”.
منى زكي فخر لمن ينتمي إلي جيلها
واختتم المخرج محمد سامي حديثه قائلًا: “بجد الكلام علي عظمة منى زكي صعب يخلص في بوست، بس حسيت بعد ما قفلت معاها إني عايز أكتب كده من كتر ما استمتعت بالكلام معاها كالمعتاد، يا بخت الفن المصري و العربي بنجمة النجوم منى زكي، و يابخت كل فنان وفنانة حضرها ونسب لفترة هي فيها، يا بخت كل زمايلها اللي من جيلها إنهم من جيل منى زكي و يا بخت كل ممثلات الجيل اللي بعدها إنهم عندهم منى زكي يتعلموا منها خاصة إنها جيل أكبر بس عشان بدأت صغيرة إنما مش أكبر منهم سنا بالعكس ما شاء الله عليها قمر و في عز شبابها و محافظه علي شكلها و أناقتها، ربنا يديم علي الفن نعمة منى زكي و دايما ناجحة و متفوقة و بتمتعنا بكل دور بتقدمه و كل مشهد بتأديه ، بحبك يا عظيمة ياللي حببتينا و لسه بتحبيبنا اكتر في مهنتنا”.
