عبد الله أبو الفتوح: مطلوب ثورة شاملة داخل الأهلي وليس تغيير مدرب فقط

اقترح المنتج عبدالله أبو الفتوح خطة لإعادة تصحيح الأوضاع داخل الأهلي، موكداً بأن الاستغناء عن ريبيرو خطوة ضرورية لكنها لا تكفي وحدها لإصلاح الفريق.

وأشار إلى أن الأزمة أعمق من الجهاز الفني، وأن الأهلي بحاجة إلى ثورة شاملة تشمل تغييرات في بعض المراكز الأساسية، والاستغناء عن بعض اللاعبين التي لم تعد قادرة على تقديم الإضافة المطلوبة.
 

وقال أبو الفتوح في منشوره على فيسبوك: "طيب المدرب الأفغاني  الأسباني حيمشي وحيجيبوا واحد تاني غالباً مصري، تفتكروا كده المشكلة اتحلت كلها؟، لا أظن ..جزء منها بس مش كلها ،المدرب ده اقل من امكانيات الفريق مظبوط و لازم يطير علطول صح جداً بس فيه ملحوظة كده قالها معلق الماتش أمبارح معرفش الناس خدت بالها منها ولا لأ".

وأوضح: "قال اللاعيبة مش بتهين نفسها في الملعب ، وده تعبير صحيح وسليم ودقيق جداً ، دي لاعيبة بتلعب علي الواقف، ليه؟! لان معظمهم اسطوات ومفيش شغيلة ، ايوه زي ما باقولك كده اي فريق كورة كبير ومكتمل لازم يبقي فيه 2 اسطوات بالكتير و3 متوسطي المقام و٥ شغيلة يخدموا علي الكورة و عليهم، طبعاً ده غير ان فيه لعيبة اصلاً مستواهم اقل من الفانلة ونقص عددي في مراكز مهمة.. بس خلينا نقول ان اول خطوات الإصلاح هي الإطاحة بريبيرو، وثاني خطوات الإصلاح من وجهة نظري وبدون شفقة هي الإطاحة بتريزيجيه، لازم وضروري شوفوا له حل ، عارف ناس حتقول كابتن الفريق وناس حتقول قدوة وناس حتقول اخلاق و تاريخ ، بس اسمعوا مني فلوسه كتير وعطائه قليل ولياقته ضعيفه وزايد وزن بالإضافة الي ان سنه كبر ، لازم الاهلي يخلص منه بسرعة، اما فايدة ده نفسياً بقي في اوضة اللبس ما اقولكش! حتخلي المعوج يتعدل لانه حيفهم ان مفيش كبير علي التسريح".

وأتبع: "نمرة تلاتة باك شمال محترم في حجم الشيبي، و نمرة اربعة رأس حربة اجنبي نمرة واحد ونريح الجماعة اللي عندنا دول شوية، وبعد كده شوبير يقف اساسي الي ان يشاء الله، للاسف الأهلي محتاج ثورة مش زي الناس ما كانت فاهمة ان اللاعيبة دي حتلعب لوحدها و تطلع نار من بوقها، دي وجهة نظري للتصحيح السريع المباشر ان كنتوا عاوزين تحصدوا بطولات السنة دي، الجمهور مش حيصبر كتير كعادته و عاوز تغيرات فورية لحظية تظهر نتائج ايجابية علطول".